माईजोगमाई: इलामको माईजोगमाई गाउँपालिकाको थुम्केरानीमा आजबाट तीन दिने पर्यटन महोत्सव शुरु हुँदै छ ।पर्यटन प्रर्वद्धन गर्ने उद्धेश्यले थुम्केरानी तुम्लिङ मेग्मा संरक्षण तथा पर्यटन प्रवद्र्धन समितिको आयोजना तथा माईजोगमाई गाउँपालिकाको आर्थिक सहयोगमा आजबाट शुरु हुँन लागेको हो ।
आयोजकले महोत्सवका लागि आवश्यक पर्ने सबै पूर्वाधार तयार भएको जानकारी दिएको छ । महोत्सवमा नेपाल–भारतको सुन्दर दृश्यावलोकनसंगै सांगीतिक कार्यक्रम समेत हुनेछ । आज २२ गतेबाट २४ गते सम्म संचालन हुने महोत्सवमा स्टल सहित स्थानीय खानाका परिकार पर्यटकका लागि राखीने आयोक समितिका अध्यक्ष रत्न थामीले जानकारी दिनु भयो । उहाका अनुासर आज स्थानीय सिंहदेबी मन्दिरको दर्शन सहित कार्यक्रमको उद्घाटन हुने छ । त्यस्तै २३ गते ट्रेकिङ सहित अन्य कार्यक्रम र २४ गते समापन सहित सांगीतिक कार्यक्रम गरीने छ ।
थुम्केरानीबाट झुल्के घामको दृश्य अवलोकनका साथै १० वटै स्थानीय तह, भारतका विभिन्न ठाउँ र तराईका फाँटको दृश्यावलोकन गर्न सकिन्छ । गाउँपालिकाको केन्द्र नयाँबजार देखि थुम्केरानी, जौबारी, तुम्लिङ्ग, टंङ्लु,मेग्मा सम्मको पैदल यात्रा समेत महोत्सवको आकर्षणको रुपमा रहेको छ । महोत्सवमा पर्यटकका लागि जंगल सफरी र दुर्लभ रेडपाण्डाको अवलोकन थप आर्कर्षक बन्ने छन । विश्वको तेस्रो अग्लो हिमशृखला, दुर्लभ वन्यजन्तु हाब्रे (रेडपान्ड) ,एसियाको दोस्रो पुरानो मेग्मा गुम्बा अवलोकनको व्यवस्था मिलाइएको अध्यक्ष थाकीले जानकारी दिनु भयो ।
महोत्सवमा गायक यम बराल ,इन्द्र गुरुङ, पदम राई, विजय मुकारुङ राई,नवीन सुवेदी लगायत स्थानीय कलाकारको प्रस्तुती रहनेछ । मुख्य आकर्षणको रुपमा हास्यकलाकारः– सुबोध गौतम (एदुमे) रहेका छन् ।एक्सीम्बल ब्यान्डको लाइभ कन्सर्टका साथै विभिन्न जातजातिका झाकी नाच हुनेछ । आन्तरिक एवम बाह्य पर्यटकलाई थुम्केरानीको बारेमा जानकारी दिने उद्धेश्यले महोत्सव आयोजना गरिएको हो । माइजोगमाई स्थित यस थुम्के डाँडामा पछिल्लो समय पर्यटकको चहलपहल बढ्दै गएको आयोजक समितिका उपाध्यक्ष राजेश थामी बताउनु हुन्छ ।
लेकाली जीवजन्तुको अवलोकन, सूर्योदयको मनोरम दृश्यले भरिएको यस क्षेत्रमा दैनिक पर्यटक पुग्ने गरेका छन । थुम्के र जौवारीमा गरिएको केसर खेतीले समेत पर्यटकलाई तान्न थालेको छ ।
माईजोगमाई गाउँपालिकाका अध्यक्ष कुश बहादुर थेवेले गाउँपालिकाको थुम्के सहित माथिल्लो लेकाली क्षेत्रको बिस्तृत अध्ययन गरी पर्यटन पूर्वाधारका काम थालिने जानकारी दिनु भयो । उहाले दिगो आर्थिक उर्पाजनका लागि पर्यटक बिकास आवश्यक भएको जानकारी दिनु भयो ।
पालिकामा उत्तरे पोखरी , शिब मन्दिर बौद्धगुम्बा सहित बिभिन्न देबिस्थल सहितका धार्मीक पर्यटकीय स्थल रहेका छन । जौवारी , तुम्लिङ, टङ्लु मेघमा लगायतका क्षेत्र बिदेशी पर्यटकको रुचीमा पर्ने क्षेत्र हुँन । जौवारी हुँदै सन्दकपुर सम्म्को यात्रा गर्न सकिन्छ ।
