फिक्कल: झापाको कमल गाउँपालिका–३ शहिदगेटस्थित पूर्वपश्चिम राजमार्गमा स्कुल बसको ठक्करबाट मोटरसाइकलमा सवार एक युवतीको मृत्यु भएको छ भने चालक घाइते भएका छन् ।
हिजो साँझ ६ः२० बजे झिलझिलेबाट केर्खातर्फ जाँदै गरेको दमक–९ स्थित सप्तश्री एकेडेमीको मे १ क ६३८ नम्बरको स्कुल बसले विपरीत दिशाबाट आउँदै गरेको प्र.नं. १–०१–०१८ प ४८८३ नम्बरको मोटरसाइकललाई ठक्कर दिएको थियो
बसको ठक्करबाट अनियन्त्रित भएको मोटरसाइकल उछिट्टिएर दमकबाट बिर्तामोडतर्फ जाँदै गरेको प्र.नं. १–०१–००१ ख ३५५४ नम्बरको ट्रकमा ठोक्किएको थियो सो क्रममा मोटरसाइकल ट्रकको दाहिने तर्फको चक्कामा परेपछि दुर्घटना भएको हो
दुर्घटनामा मोटरसाइकल चालक इलाम–८, मसार निवासी २७ वर्षीय पञ्चबहादुर लिम्बू घाइते भएका छन् भने मोटरसाइकलमा पछाडि सवार सोही ठाउँकी २१ वर्षीया माङकुमारी लिम्बूको टाउकोमा गम्भीर चोट लागेको थियो उनलाई उपचारका लागि दमक अस्पताल पठाइएकोमा चिकित्सकले परीक्षण गर्दा मृत घोषणा गरेका थिए॥
