फिक्कल: जिल्ला प्रहरी कार्यालय इलामले पार्किङ गरी राखेको सवारी साधनवाट डिजेल चोरी गर्ने २ जनालाई पक्राउ गरेको छ । पक्राउ पर्नेमा इलाम नगरपालिका ९ का २८ बर्षिय डम्बर बहादुर तामाङ र सोही स्थान बस्ने २३ बर्षिय मान बहादुर मोक्तान रहेका छन् ।
तामाङ र मोक्तानले इलाम नगरपालिका वडा नं. ९ मा पार्किङ गरी राखेको प्र १–०१–००१ क ८८४ नम्बरको टिप्परको ट्यांकीबाट ५० लिटर डिजल चोरी गरेका हुन् । विगतमा पनि उक्त स्थानमा पार्किङ गरी राखेका सवारी साधनवाट तेल चोरी हुने गरेको गुनासो आईरहे पछि प्रहरीले खोजतलास गरेको थियो । खोजतलास गर्दा घरमा डिजल लुकाई राखेको फेला पारेपछि उनीहरुलाई प्रहरीले नियन्त्रणमा लिएको हो ।
उनीहरुलाई इलाम जिल्ला अदालतबाट ७ दिनको म्याद थप गरी थप अनुसन्धान भईरहेको जिल्ला प्रहरी कार्यालय इलामका प्रहरी निरीक्षक तेज बहादुर दाहालले जानकारी दिनु भयो ।
