इलाम : आगामी मङ्सिर ४ मा हुने प्रतिनिधिसभा र प्रदेशसभा निर्वाचनका लागि नेपाली कांग्रेस जिल्ला समितिले सिफारिस गरिने उम्मेदवारको नाम टुंग्याएको छ । इलाममा पत्रकार सम्मेलन गरी सिफारिस गरिने उम्मेदवारको नाम टुंग्याएको जिल्ला सभापति डम्बर खड्काले जानकारी दिनु भयो । उहाले प्रतिनिधिसभा क्षेत्र नम्ब। १ र २ दुवैमा जिल्ला सभापति डम्बर खड्काको नाम प्राथमिकतामा सिफारिस गरेको बताउनु भयो ।
क्षेत्र १ मा सभापति खड्का र भेषराज आचार्य भूपेन्द्र कट्टेल, टीकाराम लेप्चा र सुजता परियारको नाम सिफारिस भएको छ । क्षेत्र २ मा डम्बर खड्का, भेषराज आचार्य, केशव थापा, बेनुपराज प्रसाईं, नगेन्द्र कुमाल, सुजता परियार र रमेश लिङ्देनको नाम सिफारिस भएको सभापती खड्काले जानकारी दिनु भयो ।
प्रतिनिधिसभा क्षेत्र १ को प्रदेशसभा (क) मा खगेश्वरी पौडेल बन्दना, देवेन्द्र सुवेदी, उद्धव पौडेल, देवेन्द्रकुमार राई, हुकुमलाल थेबे, हरि लुइँटेल, सञ्जीव ढकाल, प्रकाश भट्टराई र मिलन क्षेत्रीको नाम सिफारीस भएको छ । क्षेत्र १ (ख) मा सम्शेर राई, विष्णुु (हेमकुमार) कार्की, भिष्म प्रधान, निस्कल राई, जीवन नेपाल, सन्तोष गुरुङ र ध्रुव राई सिफारिस भएको बताइएको छ ।
प्रतिनिधिसभा क्षेत्र २ को प्रदेशसभा (क) मा निरोज खड्गी, राजेन्द्र शर्मा, गोविन्द गिरी, पूर्ण गौतम, राजेन्द्र बाँस्तोला र प्रदिप अर्यालको नाम छ भने क्षेत्र २ को (ख) मा लक्ष्मण पाण्डे, यामकुमार बुुढाथोकी, कमल कार्की, डम्बर बहादुर लिम्बू र रामकुमार श्रेष्ठको नाम सिफारिस भएको छ ।
क्षेत्रबाट सिफारिस भएर आएको नाम जस्ताको त्यस्तै जिल्ला समितिको बैठकले प्रदेश समितिमा सिफारिस गरिएको सभापति खड्काले बताउनु भयो । सभापति खड्काले अव युवा नेता जनताले खोजेको र रुचाएको हुँदा त्यसको लागि आफूनै योग्य भन्दै दुवै क्षेत्रबाट आफ्नो नाम सिफारिस भएको र टिकट आफ्नै आउने संकेत गर्नु भयो । सभापति खडका पार्टी सभापति देउवाका बिश्वास पात्र मानिन्छन । जिल्लामा गरेको सामाजिक कामका कारण पनि उहाको चर्चा युवा माझ बढी छ ।
नेपाली कांग्रेस जिल्ला सभापति खड्काले आगामी मंसिर ४ गते हुने निर्वाचनमा सबै सिट गठबन्धनले जित्ने दावी गर्नु भएको छ । स्थानीय तहको मत परिणामकै आधारलाई हेर्दा गठबन्धनको मत अगाडी रहेको भन्दै गठबन्धनले चुनाव जित्ने दावी गर्नु भएको हो ।
अवको चुनावमा इलामका कांग्रेस सुभेच्छुकले गठबन्धनमा इमान्दार साथ भोट हाल्ने भन्दै गठबन्धनले यसपटक चुनाव जित्ने पक्का भैसकेको दावी छ । अघिल्लो निर्वाचनमा एउटै पनि नजितेको नेपाली कांग्रेस यस पटक गठबन्धनको भागबन्डामा तीन वटा अन्य दलले लगे पनि तीन ठाउँमा कांग्रेसले जितेर फाईदा लिने खडकाले बताउनु भयो ।
भागबन्डामा क्षेत्र नं. १ को प्रतिनिधी सदस्य र प्रदेस सभा सदस्यमा नेकपा (एकिकृत समाजवादी)ले पाउँने छ । त्यस्तै क्षेत्र नं. २ को प्रदेशसभा सदस्यमा माओवादी केन्द्रले पाउँने छ भन्ने बाँकी कांग्रेसको भागमा पर्ने छ ।
नेपाली कांग्रेस जिल्ला सभापति डम्बर खड्काले मंसिर ४ को निर्वाचनबाट नेकपा (एकिकृत समाजवादी)का सम्मानीत नेता झलनाथ खनाललाई चुनाव जिताएर फेरी काँग्रेस आउने बताउनु भएको छ ।
यो चुनावमा खनाललाई जिताएर खनाललाई रास्ट्रपति बनाउने र खनालको क्षेत्रमा उपनिर्वाचन हुँदा कांग्रेसले टिकट ल्याएर फेरी चुनाव जित्ने बताउनु भएको छ । स्थानीय निर्वाचनको मतको गणना गर्दे सभापति खड्काले यसपटका गठबन्धनले दुवै क्षेत्रमा निकै मतान्तरले चुनाव जित्ने दावी गर्नु भयो । गठबन्धन कायम रहदा बिगतको मतान्तरलाई हेर्दा गठबन्धनलाई चुनाव जित्न सहज समेत छ ।
