इलाम : इलामको सुन्तलेमा एक ब्यक्तिको घरमै हत्या भएको छ । इलामको सूर्योदय नगरपालिका–११, सुन्तलेका ५१ वर्षे धनराज राईको घरमै हत्या भएको हो । प्रहरीका अनुसार उनको शव सोमबार उनकै घरको भुइँतल्लाको बीचको कोठामा भेटिएको हो । जिल्ला प्रहरी कार्यालयका डिएसपी मानबहादुर राईले टाउकोको अगाडि र पछाडिको भागमा गम्भीर चोट लागेको, कोठामा रगत लागेको अवस्थामा कोदालो, फलामको रड, आग्लोलगायत फेला परेको जानकारी दिए । जिल्ला प्रहरी प्रमुख एसपी एकनारायण कोइरालाले कर्तव्य गरी मारेको अवस्थामा शव भेटिएको बताए ।
घटनापछि खोजतलास गर्दा प्रहरीले मृतककै छोरा–बुहारीसहित छ जनालाई पक्रेको छ । पक्राउ पर्नेमा मृतककै छोरा २९ वर्षे एडवड राई तथा एडवडकै पत्नी २६ वर्षीया मालती तामाङ राई समेत छन् । उनीहरूसहित छिमेकीहरू २४ वर्षे नवीनकुमार राई, २६ वर्षे निसान राई, २० वर्षे राजीव राई र २३ वर्षे दिवस राईलाई पक्रेको प्रहरीले जनाएको छ । प्रहरीका अनुसार पक्राउ सबैलाई जिल्ला अदालतबाट आठ दिनको म्याद थप गरी अनुसन्धान भइरहेको छ ।
