प्रेम अधिकारी
पशुपतिनगर(इलाम) माघ १ गते
इलामको माईबेनीमा बर्षेनी लाग्ने मकर सघ्रान्ती मेलाको अवसरमा प्रतियोगितात्मक कृषि प्रदर्शनी सम्पन्न भएको छ । माइजोगमाई गाउँपालिका कृषि बिकास शाखाको आयोजनामा कृषि बालीलाई प्रवर्धन र बजारीकरण गर्नका लागि आयोजना गरीएको प्रतियोगितात्मक कृषि प्रदर्शनी सम्पन्न भएको हो ।
प्रतियोगितामा इलाम जिल्ला भरका ७२ जना किसानले ६ वटा बिदामा उत्पादित कृषि सामग्री प्रतियोगितामा राख्नु भएको माइजोगमाई गाउँपालिका कृषि बिकास शाखा प्रमुख उषा प्रधानले जानकारी दिनु भयो । प्रदर्शनीमा फलफुल, तरकारी, रैथाने वाली, नगदे वाली, खाद्यान्न वाली र कन्दमुल राखीएको थियो ।
प्रदर्शनीको बिभिन्न क्षेत्रबाट आएका पर्यटकले अवलोकन गरेका थिए । गाउँपालिकाले प्रदर्शनीको छनौट गर्नका लागि गाउँपालिकाका आर्थिक बिकास समिति संयोजक डम्बर सुवेदीको संयोजकत्वमा समिति बनाएको थियो । उक्त समितिले अध्ययन गरी प्रदर्शनीमा उत्कृष्ठ बस्तु ल्याउने किसानको छनौट गरेको थियो । प्रतियोगितामा माइजोगमाई ४ का नेत्र बिष्ट पहिलो, माईजोगमाई ४ कै भक्त देवान दोस्रो, माईजोगमाई ५ का गोविन्द संजेल तेस्रो र इलाम नगरपालिकाका योगेश आचार्यले सान्तवना पुरस्कार र प्रमाणपत्र प्राप्त गर्नु भयो ।
प्रतियोगितामा पहिलो , दोस्रो , तेस्रो र सान्तवना हुनेलाई बिभिन्न कृषि औजार पुरस्कार स्वरुप वितरण गरीएको माईजोगमाई गाउँपालिका उपाध्यक्ष प्रविना राईले जानकारी दिनु भयो । उहाले कृषि क्षेत्रलाई प्रवर्धन गरी बजारीकरण गर्दै किसानलाई हौसला प्रदान गर्नका लागि प्रदर्शनीको आयोजना गरीएको जानकारी दिनु भयो । उपाध्यक्ष राईले भन्नु भयो‘किसानले उत्पादन गरेका बस्तुले बजार नपाई राखेको अवस्थामा यो प्रदर्शनीले बजारीकरणमा सहयोग पुग्ने अपेक्षा राखेका छौ ।’
प्रदर्शनीमा सिमल तरुल, बन्तरुल, फर्सी , मुला, सुन्तला नरिवल, मुला , साग, मेवा टमाटर लगायतका सामग्री राखीएको थियो । गाउँपालिका अध्यक्ष कुश बहादुर थेवेले पालिकाले आयोजना गरेको प्रदर्शनीले कृषि पेशा गर्ने किसानलाई पेशा प्रति सम्मान गरेको बताउनु भयो । उहाले कृषि क्षेत्रमा उत्पादित बस्तुको बजारीकरणका लागि यस्ता प्रदर्शनीले सहयोग पुग्ने बताउनु भयो ।
माइजोगमाई गाउँपालिका भित्रमा ब्यवसायीक कृषि पेशमा लागेका पाँच हजार बढी कृषक रहेका छन । गाउँपालिकाको तल्लो क्षेत्रमा मनग्ये धान उत्पादन हुने गरेको छ भने माथिल्लो क्षेत्र जौवारीमा कृषि ज्ञान केन्द्र मार्फत ठूलो परमाणमा आलु उत्पादन हुने गरेको छ । माइबेनी मेलामा समेत कन्दमुल, सुन्तला , उखु जस्ता कृषिजन्य बस्तुको ब्यपार फस्टाएको छ । मेलामा नेपाल तथा भारतका भक्तजन र पर्यटकको भिड लागेको छ ।
