फिक्कल: इलामको माईजोगमाई ५ का पहिरो पीडितलाई माईजोगमाई गाउँपालिकाले राहत वितरण गरेको छ । माईजोगमाई ५ सोयाङका पहिरोले घरमा क्षती गरेका तीन परिवारलाई गाउँपालिकाले आज राहत सामग्री वितरण गरेको हो ।
गाउँपालिका अध्यक्ष कुश बहादुर थेवे, उपाध्यक्ष प्रविना राई, प्रमुख प्रशासकीय अधिकृत कुमार बस्नेत लगायतको टोली पीडितका घरमै पुगेर राहत सामग्री वितरण गरेको छ । पहिरोले क्षति गरेका सुकबीर राई , रमेश राई र छिरिङ प्रधानका परिवारलाई चामल, दाल, खाने तेल , साबुन लगायतका अति आवश्यक राहत सामग्री वितरण गरीएको उपाध्यक्ष प्रविना राईले जानकारी दिनु भयो । जनप्रतिनिधिले क्षति भएको स्थानको स्थलगत अध्ययन गरेको छ ।
यस्तै माईजोगमाई १ प्रेमेजुङमा समेत पहिरोले क्षति गरेको स्थानको उक्त टोलीले अध्ययन गरेको छ । लगातारको बर्षाका कारण माईजोगमाई गाउँपालिका वडा नम्बर २ शान्तिडाँडामा जमिन चर्किएर नजिकै रहेको खोलाबाट पहिरो जान थालेपछि त्यहाँ रहेका करिब ९ घर जोखिममा परेका छन् । स्थानीय मदन थामी , बलबहादुर थामी र चन्द्र थामीको गरी परिवारलाई सुरक्षित स्थानमा सारिएको छ । अन्य गंगा बहादुर महत , कमल बहादुर थामी ,लेखनाथ थामी ,दिपक थामी ,विर बहादुर महत, सोम बहादुर थामी लगायतको घर जोखीममा रहेका छन । । गाउँपालिकाले वडा नं. २ का अध्यक्ष डम्बुर सुवेदीले उक्त क्षेत्रको अवस्था बुझेर गाउँपालिकामा जानकारी गराउनु भएको छ । पालिकाले उक्त क्षेत्रका बिस्थापित परिवारलाई समेत राहत वितरण गर्ने जनाएको छ । पालिकाले बन्द भएका सडक संचालनका लागि काम गरीरहेको जनाएको छ । गाउँपालिकाको बिहिबार बसेको बैठकले पहिरो पीडितलाई तत्काल राहत दिने र बन्द भएका सडक संचालनका लागि पहल थाल्ने निर्णय गरेको थियो ।
