फिक्कल: अखाद्य बस्तुको बिक्री बितरण हुने गरेको गुनासो बढेपछि सूर्योदय नगरपालिकामा बजार आनुगमनलाई तिब्रता दिइएको छ । नगर उप प्रमुख दुर्गाकुमार बरालको संयोजकत्वमा गठित उपभोक्ता हकहित संरक्षण समितिले नगरको मुख्य बजार फिक्कलमा अनुगमनलाई तिब्रता दिएको हो ।
आईतबार र सोमबार फिक्कल बजार अनुगमन गर्दा केही थोक पसल र डिपार्टमेन्ट स्टोरमा म्याद गुज्रिएका सामग्री फेला परेको पाइएको छ । बजार अनुगमन समितिका संयोजक नविन ढकालले संचालनमा आएका नयाँ पसलमा म्याद गुज्रिएका अखाद्य वस्तु फेला परेको जानकारी दिनु भयो ।
अनुगमनका क्रममा विभिन्न ब्राण्डका चकलेट, चनाको सातु , कोक, फेन्टा , जुस , कुरकुरे , लभ क्यान्डी , गरम मसला, चिया पत्ति , थुक्पा , विस्कुट ,ढाकी पापड आदि फेला पारी बरामद गरीएको छ । दुई दिनमा फिक्कलका २२ वटा पसलको अनुगमन गर्दा १२ वटा पसलबाट ७८ हजार ४९२ रुपियाँ बराबरको अखाद्य बस्तु बरामद भएको छ । नगरले चाडबाडको समय भरी नै बजार अनुगमन गर्ने जनाएको छ । बरामद भएको सामग्री मुचुल्का उठाएर डिस्पोज गर्ने संयोजक ढकालले जानकारी दिनु भयो ।अनुगमन टोलीले म्याद गुज्रिएका बस्तु अलग गरेर राख्न, दर्ता नविकरण चुस्तदुरुस्त राख्न समेत अनुगमन गरीएका पसललाई निर्देशन दिएको छ ।
