फिक्कल: इलामको सूर्योदय नगरपालिकाको वर्खे अधिवेशन सम्पन्न भएको छ । गत वैशाख ७ गतेबाट शुरु भएको १५ औं अधिवेशन मंगलबार सम्पन्न भएको हो । मंगलबार बसेको अधिवेशनको छैटौं वैठकले स्थानीय वनको प्रवर्द्धन, संरक्षण, व्यवस्थापन तथा उपयोग सम्बन्धमा व्यवस्था गर्न बनेको विधेयक, २०८१ , नगर सडक यातायात गुरुयोजना पुनरावलोकन सम्बन्धी प्रस्ताव, दिगो विकास लक्ष्यको स्थानीयकरण मार्गचित्र (२०२४–३०) र विपद उत्थानशील योजना पारित गरेको छ ।
नगरसभाको वर्षे अधिवेशनबाट नीति कार्यक्रम, आगामी वर्षको बार्षिक बजेट, न्यायिक समितिले उजुरीको कारबाही किनारा तथा फैसला कार्यान्वयन गर्दा अपनाउनु पर्ने कार्यविधिका सम्बन्धमा व्यवस्था गर्न बनेको विधेयक, २०८१ र सूर्योदय नगरपालिकाको सवारी तथा यातायात व्यवस्थापन ऐन, २०७६ लाई संशोधन गर्न बनेको विधेयक, २०८१ समेत पारित गरेको छ ।
नगर सभाको अधिवेशन अन्त्य गर्दै नगर प्रमुख रण बहादुर राईले नगरको विकासका लागि सबैले पहल र साझेदारी गर्नु पर्ने बताउनु भयो । उहाले सूर्योदय नगरपालिका अन्य पालिकाको लागि सिकाइको थलो बन्दै गएकाले नमूना नगर बन्ने गरी काम गर्न जनप्रतिनिधि र कर्मचारीको ध्यानाकर्षण गराउनु भयो ।
यस अधिवेशनले सूर्योदय नगरपालिकाको आगामी वर्षको लागि १ अर्व ४१ करोड ४६ लाख २७ हजार ५ सय रुपियाँको वार्षिक बजेट पारित गरेको छ । चालु आर्थिक वर्षको समाप्ति सँगै सूर्योदय नगरपालिकाले कुल वार्षिक बजेटको ८८.३८ प्रतिशत खर्च गरेको छ । कूल १ अर्ब ९ करोड ५८ लाख ७५ हजार ७८१ वार्षिक बजेटमध्ये ९६ करोड ८५ लाख ६८ हजार ५९४.२४ खर्च गरेको छ । चालु खर्चका लागि ६९ करोड ८३ लाख ७५ हजार १७० विनियोजन मध्ये. ६१ करोड ६० लाख ७८ हजार ९८९.१६ अर्थात् ८८.२२% खर्च भएको छ। त्यस्तै पूंजीगत खर्चका लागि ३९ करोड ७५ लाख ७६४ विनियोजन मध्ये ३५ करोड २४ लाख ८९ हजार ६०५.०८ अर्थात ८८.६८% खर्च भएको छ । यस वर्षको बजेट गत असार २०८० को १३ औं अधिवेशनबाट पारित भएको हो ।
