चुलाचुली: राष्ट्रिय स्वतन्त्र पार्टी ९रास्वपा० इलाम २ का उम्मेदवार मिलन योङहाङ लिम्बूले चुलाचुली क्षेत्रका आफ्ना मतदाताहरुसँग भेटघाट गर्दै चुनावी प्रचार–प्रसारलाई तिब्रता दिएका छन् ।
मतदातासँग भेटघाट गर्ने क्रममा चुलाचली पुगेका उनले सञ्चारमाध्यमसँग कुरा गर्दै मतदाताहरुले नयाँ पार्टी रास्वपाप्रति निकै ठूलो उत्साह देखाएकाले आफ्नो विजय सुनिश्चित भएको बताए । ‘चुलाचुली आएपछि मलाई के थाहा भयो भने यहाँका मतदाताहरु पुराना पार्टीहरुको व्यवहारबाट निकै वाक्क दिक्क हुनु भएको छ । त्यसैले उहाँहरुमा नयाँ पार्टीप्रति निकै उत्साह छ ।’, लिम्बूले भने ।
जनताले दिएको मायाका आधारमा आफू जित्ने निश्चित भई सकेको भन्दै उनले आफू जनताको मतको प्रतिक्षामा रहेको बताए । रास्वपाको चुनाव प्रचार–प्रसार टोलीमा इलामका संयोजक प्रकाश सापकोटा, सह–संयोजक सन्तोष श्रेष्ठ, कोशी प्रदेशका सभापति राजेश तिम्सिना, झापा संयोजक उमेश खरेल, चुलाचुली गाउँपालिका सचिव लोकनाथ पौडेल लगायतका नेता कार्यकर्ताहरु रहेका छन् ।
आगामी वैशाख १५ मा इलाम २ मा हुन लागेको उपनिर्वाचनमा इलामका सबै राजनीतिक पार्टीका साथै स्वतन्त्रहरुले पनि आफ्नो चुनावी प्रचार–प्रसारलाई अघि बढाएका छन् । इलाममा मतदान हुनका लागि अझै १६ दिन बाँकी रहँदा सबै पार्टीहरु आ–आफ्नो चुनावी प्रचारमा होमिएका हुन् ।
चुनावमा आफ्ना उम्मेदवारलाई जिताउनका लागि रास्वपाका तर्फबाट पार्टी सभापति रवि लामिछाने इलाम आउने कार्यक्रम रहेको छ भने एमालेका तर्फबाट पनि पार्टी अध्यक्ष केपी ओली तथा नेपाली काँग्रेसका तर्फबाट महामन्त्रीद्वय गगन थापा र विश्वप्रकाश शर्मा पनि इलाम आएका छन ।
यो निर्वाचनमा एमालेलाई आफ्नो तीन दशकको विरासत जोगाउने चुनौती छ भने नेपाली काँग्रेसलाई तीन दशकदेखिकै पराजयको मुल्य चुक्ता गर्ने चुनौती रहेको छ । तर, पुराना राजनीतिक दलहरुको विरुद्ध आवाज उठाउँदै उदाएको रास्वपालाई भने इलामको विजय हासिल गर्दै पूर्वलाई आफ्नो आधारभूमी बनाउने चुनौती छ ।
रास्वपाको केन्द्रीय नेतृत्वले इलामको निर्वाचनलाई विशेष महत्वका साथ अघि बढाउनकै लागि सह–महामन्त्री कविन्द्र बुर्लाकोटीलाई चुनावी कमाण्डर बनाएर इलाममै खटाएको छ । अब के हेर्न बाँकी छ भने आगामी १५ गतेको उपनिर्वाचनमा इलामेली जनताले पुराना पार्टीलाई रोज्छन कि नयाँलाई भन्ने प्रश्न सबैका लागि रोचक बनेको छ ।
