इलामः इलामेली समाज दक्षिण कोरियाले इलाम जिल्ला १० वटै स्थानीयतहका ग्रामीण क्षेत्रमा ३० लाख बाराबरको स्वास्थ्य सामाग्री वितरण गरेको छ । ग्रामीण क्षेत्रमा स्वास्थ्य सामाग्री सहयोगार्थ गत वर्ष सेक्टेम्बर ३० तारिकमा समाजद्वारा ‘इलाम चियाबारी साँगीतिक धमाका २०२३’ कोरियामा आयोजना गरेको थियो ।
नेपाली कलाकारहरु कोरियामा लगेर सांगीतिक कार्यक्रमको गरेको यस कार्यक्रमबाट बचेको रकम जिल्लाको चार नगरपालिका र छ गाउँपालिका गरी जम्मा १० वटा स्थानीयतहमा सामाग्री पुर्याएको समाजका पुर्व अध्यक्ष दपर्ण गुरुङले बताए ।
२४ वटा स्वास्थ्य कार्यालयहरुमा एकै साथ सामाग्रीसहित समाजले प्रकाशन गरेको नयाँ वर्ष २०८१ सालको क्यालेण्डर पनि हस्तान्तरण गरिएको समाजका अध्यक्ष टिका थेगिमले जानकारी गराए । स्वास्थ्य क्षेत्रमा सहयोग पुर्याउने उदेश्यले समाजका प्रतिनिधिहरु मार्फत स्थानीयतहका सरोकारवालहरुलाई समान हस्तान्तरण गर्न चुलाचुली गाउँपालिकाको तोरीबारी,साक्फारा फुङनाममा चन्द्र बहादुर राई,माङ्सेबुङको लारुम्बा र गजुरमुखीमा नरेन्द्र कुमार राई र धडकन सम्बाहाम्फे,फाकफोकथुमको फुएतप्पा,ठिंगेपुर, एकतप्पामा दिपक योङहाङ र मिलन सम्बाहाम्फे, रोङमा राजन चाम्लिङ,सुर्योदय नगरपालिकामा प्रेम रिजाललाई प्रतिनिधि खटाएको थियो ।
यसैगरी, माई नगरपालिकाको थाक्ले, सालबोटे,माई जोगमाईको सोयाङ र जोगमाई,सन्दकपुरको जमुना, माबु र फेमेगुरु इलाम नगरपालिकाको सुम्बेक,सॉंखेजुङ,बरबोटे र पिपलबोटे साथै देउमाई नगरपालिकाको चमैता, मैदाने र शान्तिडॉंडालगायत १५ स्थानलाई इलाम बजारबाट समाजका पूर्वअध्यक्ष दर्पण गुरुङ, वर्तमान कार्यसमिति सदस्य यामु राई र मान बहादुर लिम्बु लगायतको टिमले वितरण गरेको जनाइएको छ ।
सूर्योदय र हरियाली इलामको पहिचान, पर्यटन प्रवर्धन र समाज सेवा हाम्रो अभियान भन्ने नारा लिएर सन् २०१४ मा इलाम घर भइ दक्षिण कोरियामा रहेका नेपालीले स्थापना गरेको संस्था हो । संस्थाले स्थापना कालदेखिनै दक्षिण कोरियामा स्थापित विभिन्न संघसंस्थाहरुसंग हातेमालो,सहकार्य र भाइचाराको सम्बन्ध बनाउँदै कोरियामा आपत विपतमा परेका नेपालीको उद्धार नेपालमा रहेका हरेक पीडित परिवारलाई सहयोग गर्दै आएको छ ।
विदेशमा रहेर पनि नेपालमा बसोबास गर्ने नेपालीलाई हरेक क्षेत्रमा सहयोग गर्ने साथै आफ्नो भुगोलको भलाईमा हरपल एक जुट भएर शिक्षा,स्वास्थ्य,पर्यटन,विकाश निर्माणलगायतमा साथ सहयोग गरिरहेको अध्यक्ष थेगिमको भनाइ छ ।
