इलामः सूर्योदय नगरपालिकाले आयोजना घरेको शारीरिक अपाङ्गता परिक्षण घुम्ती शिविरमा सेवा लिन चुलाचुली गाउँपालिकाबाट आउनुभएका १७ बर्षीय बालकलाई अब खुट्टा टेक्न सक्छुकी भन्ने आशा जागेको छ । ‘मेरो जन्मजात खुट्टाको पैताला बाहिर फर्किएको हो । सजिलो गरी टेक्न सक्दिन, आजको शिविरमा डाक्टरले अप्रेसन गर्नुपर्छ भनेर नाम सिफारिस गरिदिनुभएको छ, निको भयो भने धेरै काम गर्न सक्छु भन्ने आशा छ ।’ उहाँले भन्नुभयो ।
नगरपालिकामा सोमबार सम्पन्न घुम्ती शिविरमा सेवा लिन इलामको सूर्योदय सहित रोङ गाउँपालिका, देउमाई नगरपालिका, फाकफोकथुम,माङ्सेबुङ,चुलाचुली र झापा जिल्लाबाट गरि ५८ जना आएको महिला बालबालिका तथा समाज कल्याण शाखाकी प्रमुख तारा शेर्पाले बताउनुभएको छ । तीमध्ये २६ बालिका र ३२ बालक रहेको शेर्पाले जानकारी दिनुभएको छ । अपाङ्गता बाल अस्पताल तथा पुनस्र्थापना केन्द्र बनेपा र सूर्योदय नगरपालिकाको संयुक्त आयोजनामा १८ बर्ष सम्मका शारीरिक अपाङ्गगता भएका बालबालिकाहरुको परिक्षण सम्पन्न गरिएको उहाँको भनाई छ ।
‘शिविरमा हात खुट्टा भाँचिएर बाङ्गो भएको वा हड्डी नजोडिएको, जन्मजात वा चोटपटकबाट कम्मरको जोर्नी खुस्किएको, ढाड बाङ्गो वा कुप्री भएको जस्ता बिरामीले सेवा लिनुभएको छ ।’ शाखाकी कर्मचारी सरला तामाङ्गले भन्नुभयो, ‘अप्रेसन गर्नुपर्ने देखिएका जटिल चार जना सिफारिस गरिएको छ । अन्यलाई चेकजाँज औषधी वितरण र आवश्यक परामर्श दिने काम भयो ।’
सूर्योदय जिल्लाको पहिलो,कोशी प्रदेशको तेश्रो र देशको दशौँ बालमैत्री स्थानीय शासनयुक्त नगरपालिका हो । ५८ औँ बाल दिवसको अवसरमा २०७९ भदौ २९ गते सूर्योदयलाई बालमैत्री स्थानीय शासनयुक्त नगरपालिका घोषणा गरिएको थियो । पूर्वप्रधानमन्त्री झलनाथ खनालको प्रमुख आतिथ्यतामा सूर्योदयलाई बालमैत्री स्थानीय शासनयुक्त नगरपालिका घोषणा गरिएको थियो ।
सूर्योदय नगरपालिकाका नगर प्रमुख रणबहादुर राईले दिगो विकासका लक्ष्य पूरा गर्न अघि बढेको बताउनुभयो । उहाँले दिगो विकासका लागि बालमैत्री स्थानीय शासन महत्त्वपूर्ण भएको बताउनुभएको छ । ’एक वर्षको समृद्धिका लागि खेती गर्नुहोस् । दश वर्षको समृद्धि चाहनुहुन्छ भने रूख रोप्नुस् । सय वर्षको समृद्धिका लागि बालबालिकाको संरक्षण गर्नुस् ।’ उहाँले भन्नुभयो,’बालमैत्री स्थानीय शासन घोषणा गर्न १८ महिनादेखि मिहिनेत गर्नुपरेको थियो । ५१ वटा राष्ट्रिय सूचकसँगै नगरपालिकाका ३ सूचक पूरा गरेर घोषणा गरेका हौँ।’
