फिक्कल: इलामको माईबेनी दोभानमा माघे सङ्क्रान्ति (मकर) मेला लागेको छ । इलाम नगरपालिका र माईजोगमाई गाउँपालिकाको संगमस्थल माइवेनीमा बर्सेनि लाग्दै आएको माघे सङ्क्रान्ति मेला यस वर्ष पनि लागेकोे हो ।कोरोना महामारी पछि यसपालि मेला भब्य रुपमा लागेको मेला आयोजक समितिले जनाएको छ ।
माईखोलामा स्नान गर्दा सबै पाप हरण हुने धार्मिक विश्वासका साथ मेला लागने गरेको छ । सोमबार बिहानै देखि माईबेनी दोभावमा रहेको माइ भगवती मन्दिरमा पुजा गर्नेको भिड लागेको इलाम नगरपालिका वडा नं. १० का अध्यक्ष दिलिप प्रधानले जानकारी दिनु भयो ।
मेलामा इलाम सहित छिमेकी जिल्ला पाँचथर, ताप्लेजुङ, तेह्रथुम तथा सीमावर्ती भारतको दार्जिलिङ, सिक्किम, मिरिकबाट पर्यटक माइृबेनी आएका छन । यसरी आएका भक्तजन तथा पर्यटक सात दिन सम्म बस्ने गरेको माईजोगमाई गाउँपालिकाका अध्यक्ष कुश बहादुर थेवेले जानकारी दिनु भयो । दुबै पालिकाले समन्वय गरी मेला ब्यवस्थापनको काम गरीएको अध्यक्ष थेवेले जानकारी दिनु भयो ।
मेलाका लागि बजार व्यवस्थापन र माइखोलाको किनारलाई सफा गरी तीर्थालुलाई नुहाउन सहज बनाइएको थियो । माइवेनी मेला भर्न आउनेको भीडसंगै स्थानीय स्तरमा उत्पादन हुने उखु तरुल र सुन्तलाको धेरै ब्यपार भएको छ ।
जोगमाई र माई खोलको दोभानमा रहेको माइबेनी इलामका दुई स्थानिय तह इलाम नगरपालिका र माइजोगमाई गाउँपालिकाको संगम स्थल हो । माइबेनी इलाम जिल्ला कै महत्वपूर्ण धार्मिक स्थल पनि हो । माईबेनी दोभानमा स्नान गर्दा र पूजाआजा गर्दा मनोकामना पूरा हुने जनविश्वास रहेको छ । रमाईलो मेला सहित बिभिन्न सांगीतिक कार्यक्रम समेत सम्पन्न भएको आयोजकले जनाएको छ ।
