फिक्क्ल : सूर्योदय नगरपालिकाले पाँच बर्षे शिक्षा योजना निर्माणको काम थालेको छ । नगरले पाँचबर्षे शिक्षा योजना निर्माणका लागि सरोकारवाला संग छलफल गरी राय सुझाव लिएको हो ।
पाँच बर्षे शिक्षा योजनाको खाका तयार गरी नगरले सरोकारवाला संग छलफल गरी सुझाव संकलन गरेको छ । शिक्षा युवा तथा खेलकुद शाखाले आयोजना गरेको कार्यक्रममा बिद्यालयका प्रधानाध्यापक , बिद्यालय ब्यवस्थापन समिति अध्यक्ष, शिक्षक, शिक्षा समितिका सदस्य सहित प्याब्सनका पधाधिकारीको सहभागीता रहेको थियो ।
सूर्योदय नगरपालिका सामाजिक बिकास समितिका संयोजक डिक बम्जनको अध्यक्षता तथा नगर प्रमुख रण बहादुर राईको प्रमुख आथित्यतामा सम्पन्न कार्यक्रममा शाखा प्रमुख योगनिधि भट्टराईले सूर्योदय नगरपालिकामा रहेका सामुदायिक र संस्थागत बिद्यालयको अवस्था बारे प्रतिवेदन प्रस्तु गर्नु भएको थियो । कार्यक्रमा ७ वटा समुह बनाई बिभिन्न बिषयमा सुझाव लिईएको छ ।
सरोकारवालाले बिद्यालयको भौतिक अवस्था , शिक्षक ब्यवस्थापन, प्रविधिमैत्री शिक्षा लगायत दर्जनौ बिषयमा सुझाव दिएका छन । कार्यक्रममा बोल्दै नगर प्रमुख राईले नगरको शिक्षा क्षेत्रलाई उकास्नका लागि सबैको जिम्मेवारी रहेको बताउनु भयो । उहाले लक्ष्य बिहीन दौडिएर कहि नपुगिने भन्दै लक्ष्य निर्धारण गरे अगाडी बढन शुरु गरएिको बताउनु भयो । उहाले पाँच बर्षको योजना बने पछि मात्र नगरले कति बजेटको ब्यवस्था गर्ने भन्ने टुंगो लाग्ने जानकारी दिनु भयो । शाखा प्रमुख भट्टराईले संयोजन गर्नु भएको कार्यक्रममा शाखाका स्रोत ब्यक्ति शुर्दशन खतिवडाले स्वागत मन्तब्य राख्नु भएको थियो ।
कार्यक्रममा प्याब्सन केन्द्रिय उपाध्यक्ष युवराज बाशिष्ठ, सूर्योदय प्याब्सनका अध्यक्ष लार्केल लामा , प्रमुख प्रशासकीय अधिकृत मिलन भट्टराई लगायत सरोकारवालाको सहभागिता रहेको थियो । नगरले तयार भएको शिक्षा योजनाको ड्राफ्ट र सरोकारवालाको सुझावलाई अध्ययन गरी अन्तिम रुप दिने जनाएको छ ।
