माइजोगमाई : इलामको माइजोगमाई गाउँपालिकामा आँखा शिविर सञ्चालन गरिने भएको छ । पालिका छ वटै वडामा विद्यार्थी र ५० वर्षमाथिका नागरिकको आँखा निःशुल्क जाँच गर्न लागिएको हो । माइजोगमाई गाउँपालिका, इलामस्थित नेत्रज्योति संघ, लहान आँखा–कान उपचार केन्द्र र विराटनगर आँखा अस्पतालको आयोजनामा पुस १ देखि शिविर सञ्चालन गरिने गाउँपालिकाले जनाएको छ ।
पालिका उपाध्यक्ष प्रविना राईले वडा ४ मा पुस १ गते शिविर आयोजना गरिने बताइन् । ‘पुस १ गते वडा ४ का विद्यार्थीका लागि शिविर सुरु हुनेछ,’ उनले भनिन्, ‘त्यसपछि ५० वर्षभन्दा माथिका व्यक्तिका लागि र क्रमसः सबै वडामा आयोजना गरिने छ ।’ शिविर आयोजनाका लागि पालिका र आयोजकबीच अभिमुखीकरण कार्यक्रम नयाँबजारमा सम्पन्न भएको छ । शिविरमा कानको समेत जाँच गरिने छ ।
आँखा जाँचपछि सेवाग्राहीलाई आवश्यक परे चस्मासमेत निःशुल्क वितरण गरिने संघ अध्यक्ष इन्द्र फुँएलले जानकारी दिए । तर, चस्मा भने फिक्कलबाट वितरण गरिने छ । फुँएलको अध्यक्षता तथा गाउँपालिका अध्यक्ष कुशबहादुर थेवेको प्रमुख आतिथ्यमा सम्पन्न अभिमुखीकरणमा गाउँपालिका उपाध्यक्ष प्रविना राई र प्रमुख प्रशासकीय अधिकृत कुमार बस्नेतसहित छ वटै वडाका वडाध्यक्ष, वडासचिव, कार्यपालिका सदस्य र वडा सदस्यलगायतको उपस्थिति थियो ।
