सन्दकपुर : कोरोनाको उच्च जोखिममा रहेको इलामको उत्तरी स्थानीय तह सन्दकपुर गाउँपालिकामा शनिबार ५१ जनाको स्वाब संकलन गरिएको छ । संक्रमित देखिएको वडा नं ४ र ३ का स्थानीयलाई संक्रमितसंगको हेलमेलको आधारमा कन्ट्याक्ट ट्रेसिङ पहिचान गरी स्वाब संकलन गरिएको हो । वडा नं ३ सुलुबुङमा ३८ जना र वडा नं ४ माबुमा १३ जनाको स्वाब लिइएको छ ।
गत भदौ ५ गते पञ्चकन्या हाइड्रो पावरमा कार्यरत कर्मचारीको परिवारमा गरिएको परिक्षणमा ४ जनामा पोजेटिभ देखिएको थियो । समुदाय स्तरमा कोरोना फैलि नसकेको भएपनि हाइड्रोपावर क्षेत्रमा जोखिम रहेकाले अहिले गाउँपालिका क्षेत्रमा लकडाउनका साथै वडा नं ४ र वडा नं ३ को आशिंक क्षेत्रमा सिल गरिएको छ ।
