इलाम: इलामको ठूलो टुँडिखेलमा आउँदो माघमा ‘इलाम गोल्डकप’ आयोजना गरिने भएको छ । माघ ६ देखि १३ सम्म आयोजना गरिने गोल्डकपमा आठ टिम सहभागी हुनेछन् । आयोजक रेडहर्स फुटबल क्लबले इलाम सदरमुकाममा पत्रकार सम्मेलन गरी प्रतियोगिताबारे जानकारी दिएको छ । पत्रकार सम्मेलनमै सहभागी माइभ्याली फुटबल क्लब पदाधिकारीले भने यसअघि घोषित ‘माइभ्याली गोल्डकप’ भने तत्काललाई स्थगित गरिएको बताएका छन् ।
माइभ्यालीले यसअघि पत्रकार सम्मेलन नै आयोजना गरी आउँदो फागुन २४ देखि चैत ३ सम्म माइभ्याली गोल्डकपको सातौं संस्करण आयोजना गर्ने घोषणा गरेको थियो । तर, तत्काललाई इलाम गोल्डकपलाई नै प्राथमिकता दिने माइभ्याली अध्यक्ष दिनेश काफ्लेले जानकारी दिए । ठूलो टुँडिखेलमा रेडहर्स फुटबल क्लबले आयोजना गर्ने इलाम गोल्डकपमा भने नेपाल र देशबाहिरका गरी आठ टिम सहभागी हुनेछन् । आयोजकसहित चर्च ब्वाइज, एनआरटी, झापा, सुनसरी, बाग्मतीसहितका टिम सहभागी हुने आयोजक रेडहर्सका महासचिव प्रकाश घिमिरेले जानकारी दिए ।
उनका अनुसार प्रतियोगितामा सहभागी हुने केही टिमको टुंगो लाग्न बाँकी नै छ । ‘विजेताले नगद पाँच लाख र उपविजेताले तीन लाख रुपैयाँ नगद, ट्रफी र प्रमाणपत्र पाउनेछन् । अखिल नेपाल फुटबल संघ ९एन्फा०का पूर्वसदस्य निरोज खड्गीले प्रतियोगिता सञ्चालन गर्न स्रोत खोजी भइरहेको जनाए । ‘
