फिक्कल: नजिकिदै गरेको चाडबाडलाई लक्षित गरी इलामको सीमावर्ती पशुपतिनगरमा संयुक्त सुरक्षा पोष्ट (हेल्प डेक्स) स्थापना गरीएको छ । नेपाल भारत सीमा क्षेत्रमै चाडबाडमा आउजाउ गर्ने यात्रुको सहजताका लागि सुरक्षा पोष्ट स्थापना गरीएको हो ।
दशै तिहार जस्ता चाडवाडका बेला कामको शिलशिला र बिभिन्न कार्यका लागि भारत गएका नेपाली पशुपतिनगर नाकाबाट घर फर्कीने र नेपालमा कामका लागि आएका भारतीय समेत भारत फर्कदा सीमानामा भिडभाड हुने गरेका कारण संयुक्त सुरक्षा पोष्ट स्थापना गरीएको इलामका प्रमुख जिल्ला अधिकारी श्रवण कुमार पोख्रेलले जानकारी दिनु भयो । प्रजिअ पोख्रेलले भन्नु भयो‘सीमा क्षेत्रमा कुनै पनि देशका नागरिक नठगीउन र कसैले दुख नपाओस भन्ने हाम्रो उद्देश्य हो ।’
नेपालका सुरक्षा निकायका प्रतिनिधि र भारतीय सीमा सुरक्षा बल(एस.एस.बी.)का प्रतिनिधिले सीमानामा संयुक्त पोष्ट खडा गरेका हुँन । चाडबाडमा यात्रुको चाप बढी हुँदा यातायतका साधनमा महंगो भाडा लिने गरीएको छ । उक्त पोष्टमा रहेका प्रहरीले दुबै देशका नागरीकलाई सहजीकरण गर्ने प्रजिअ पोख्रेलले जानकारी दिनु भयो ।
दुबै देशका सुरक्षा निकायले सीमा क्षेत्रमा आउजाउ गर्ने ब्यक्तिको निगरानी गरी गन्तब्य सम्म पुग्नका लागि सहजीकरण गर्ने जनाईएको छ । उक्त नाका भएर पूर्वदेखि पश्चिम नेपालका नागरीक समेत भारतमा काम गरेर दशैमा घर फर्कीने गरेका छन ।
पशुपतिनगरको सीमा क्षेत्रमा यस अघि नै सूर्योदय नगरपालिकाले पर्यटन सूचना केन्द्र स्थापना गरीसकेको छ । सूचना केन्द्रमा पर्यटकलाई सहजीकरण गर्ने र पर्यटकको दर्ता समेत राख्ने गरीएको छ ।
