फिक्कल: इलामको नेपाल भारत सीमा क्षेत्र पशुपतिनगरमा सटही काउन्टर राखीने भएको छ । लामो समय देखि सटही काउन्टर राख्न स्थानीयले माग राख्दै आएकोमा गभर्नर महाप्रसाद अधिकारीले पशुपतिनगरमा तत्काल सहटी काउन्टर राख्न निर्देशन दिनु भएको हो । सूर्योदय नगरपालिकाका नगर प्रमुखको छलफल पछि सटही काउन्टर राख्न उहाले निर्देशन दिनु भएको छ । काठ्माण्डौमा भएको छलफल पछि भारतीय रुपियाँ सटहीको समस्या हटाउनका लागि काउन्टर स्थापना गर्ने सहमती भएको नगर प्रमुख राईले जानकारी दिनु भयो । पशुपतिनगरमा भारतीय पचास र एक सय रुपियाँका साना नोट साटेर नेपाली बनाउन वाणिज्य बैंकलाई निर्देशन दिएको छ ।
‘गभर्नर अधिकारीले राष्ट्रिय वाणिज्य बंैकका कार्यकारी निर्देशकलाई पशुपतिनगरमा सटही काउन्टर खोल्न निर्देशन दिई सक्नु भएको छ’ नगर प्रमुख राईले भन्नु भयो । लामो समय देखि माग भए पनि सटही काउन्टर नहुँदा सीमा क्षेत्रमा अहिले भारतीय नोट नसाटिने समस्या रहेको स्थानीय ब्यवसायी बिमल देवानले जानकारी दिनु भयो । उहाले भन्नु भयो‘भारतीय नोटको चाङ हुँदा पनि साट्ने अवस्था थिएन, अव सहज हुने भयो ।’
पशुपतिनगर नाकाबाट बिशेष गरी इलाम सहितका पहाडी जिल्लामा उत्पादन भएको सागसब्जी भारत जाने गरेको छ । केहि समय अघि भारतले इस्कुसलाई क्वारेन्टाईन लिष्टमा राखेपछि इस्कुसको निर्यात समेत बढेको छ । यसरी बिक्री भएको सागसब्जीबाट आएको भारतीय रुपियाँ साट्न भने ब्यवसायीलाइृ धौधौ पर्दै आएको थियो ।
कोरोना महामारी पछि सुनसान बनेको पशुपतिनगरले अझै गति भने लिन नसकेको सूर्योदय उद्योग बाणिज्य संघका अध्यक्ष प्रमोद राईले जानकारी दिनु भयो । उहाले कोरोना पछि दर्जनौ ब्यवसायी बिस्थापित समेत भएको जानकारी दिनु भयो । अध्यक्ष राईले सटही काउन्टर स्थापना भएपछि सटहीको समस्या हटेर सहज हुने जानकारी दिनु भयो । काउन्टर राख्नका लागि संघले समेत माग गर्दै आएको थियो । काउन्टर स्थापना भए पछि मोवाइल ब्याङकिङबाट पनि सटहिको काम हुने बताईएको छ ।
