फिक्कल
इलामको मङलबारे पुङ्फुङ सडक अन्तर्गत देउमाइखोला – कमेरे खण्डको सडक निर्माणमा भएका कमीकमजोरी सुधार गरेर काम गर्ने सहमती भएको छ ।
बुधबार जिल्ला समन्वय समिति उप प्रमुख चित्रकला बराईलीको नेतृत्वमा भएको अनुगमनका क्रममा समन्वय समिति , फाकफोकथुम गाउँपालिकाका जनप्रतिनिधि , निर्माण ब्यवसायी र स्थानीय बिचमा भएका कमीकमजोरीको सुधार गर्दै सडक निर्माण कार्य सम्पन्न गर्ने सहमती भएको हो ।
स्थानीयले कमसल काम भएको गुनासो गरेपछि समन्वय समितिको अगुवाईमा अनुगमन गरिएको थियो । अनुगमनका क्रममा केहि स्थानमा सडकको ग्राभेल उक्कीएको पाईएको उप प्रमुख बराईलीले जानकारी दिनु भयो । उहाले उक्कीएको ठाउँमा ग्राभेल थप्ने र मौसममा सुधार आए पछि मात्र सडक कालोपत्रे गर्ने सहमती भएको जानकारी दिनु भयो ।
उप प्रमुख बराइली सहित फाकफोकथुम गाउँपालिका अध्यक्ष दिपेन्द्र खनाल, उपाध्यक्ष कल्पना राई , निर्माण ब्यवसायी सन्तोष कट्वाल , प्राविधिक सहित स्थानीय सरोकारवाला बिच सडक निर्माण भैरहेको कमेरेमा छलफल भएको थियो ।
छलफलमा निर्माण ब्यवसायी कटवालले सडक निर्माणका क्रममा देखिएका कमीकमजोरी सुधार गर्दै जाने , कमसल भनीएका स्थानमा थप सुधार गरेर मात्र कालोपत्रे गर्ने प्रतिवद्धता जनाउनु भएको थियो ।
मंगलबारे कमेर ९ दशमलब ५ किलोमिटर र इभाङ क्षेत्रको १३ दशमलब २ किलोमिटर सडक भ्याट बाहेक ५२ करोड ९४ लाखमा गुजुमुखी जेभीले ठेक्का सम्झौता गरी काम गरीरहेको छ । सडकको नाली र ग्राभेलको काम सम्पन्न भई कालोपत्रे हुने क्रममा रहेको छ । जस मध्ये ६ किलोमिटर कालोपत्रे भैसकेको छ । एडीबीको आर्थिक सहयोगमा प्रदेश सरकार मार्फत उक्त सडकको निर्माण भैरहेको छ । फाकफोकथुम गाउँपालिका उपाध्यक्ष कल्पना राईले गुणस्तरीय काम गराउनका लागि गाउँपालिकाले निरन्तर पहल गरीरहेको जानकारी दिनु भयो । गाउँपालिका अध्यक्ष दिपेन्द्र खनालले निर्माण ब्यवसायी संग सरोकारवाला बिच सहमति भैसकेकाले गुणस्तरीय काम हुँनेमा आफु ढुक्क् रहेको बताउनु भयो ।
