इलाम : इलाममा सहकारी मार्फत् किसानलाई बाँड्नुपर्ने रासायनिक मल बेच्ने कृषि बिज भण्डारलाई २ लाख रुपैयाँ जरिवाना गरिएको छ । सदरमुकामको मालापथमा भेषराज पराजुलीले सञ्चालन गरेको पसलमा सहकारी मार्फत् किसानलाई बाँड्नुपर्ने अनुदानको रासायनिक मल फेला परेपछि जरिमाना गराईएको हो ।
गएको बुधबार बजार अनुगमन गर्ने क्रममा उक्त कृषि विज भण्डारमा अनुदानको रासायनिक मल फेला परेपछि बिभिन्न संचार माध्यमले निरन्तर समाचार प्रकाशन गरिरहेको थियो ।
अनुदानको मल विक्री अनुमति बेगर नै मल बिक्रि गरेको पाइएपछि प्रशासनले मल गोदाम नै शिल गरेको थियो भने तीन दिनभित्रमा कागजात बुझाउन समय दिइएको थियो । म्याद असार १७ मा सकिँदासम्म पसलले मलको अधिकारिकताबारे कुनै प्रमाण दिन नसकेपछि आइतबार जरिमाना सहित गोदाममा राखिएको मल जफत गराएको छ ।
पराजुलीले सञ्चालन गरेको पसलमा अनुगमनमा ३४ बोरा युरिया र १८ बोरा डिएपी मल भेटिएको थियो । पसल सञ्चालकले झापाको चारआलीबाट मल ल्याएको भने पनि त्यससम्बन्धी कुनै पनि प्रमाण नभएपछि छानबिन गरिएको थियो । उता सहकारीलाई पनि छानबिन भइरहेको बताइएको छ ।
