फिक्कल: नयाँ बर्ष २०८० को अवसरमा इलाममा खुल्ला म्याराथुन म्याराथन हुने भएको छ । आगामी वैशाख १ गते खेलकुद विकास, स्वास्थ्यकर जीवन,इलामको अभियान पर्यटन प्रवर्द्धन भन्ने नाराका साथ म्याराथन हुँने भएको हो ।
पर्यटन प्रवद्र्धन गर्ने उद्देश्यले इलाम नगरपालिका, सन्दकपुर गाँउपालिका र नेपाली सेनाको रणसार्दुल गणको संयुक्त आयोजनामा इलाम–माईपोखरी म्याराथन हुने भएको छ । म्याराथन पुरुष र महिला दुवै विधामा हुने छ ।
पुरुष तर्फको म्याराथन ४२ दशमलव २ किलोमिटर हुनेछ । इलाम नगरपालिका–१० गोदकको मेची राजमार्ग स्थित नारायण चोक–माईखोला–इलाम बजार–बिब्ल्याटे–धारापानी–माईपोखरी–सातखाल्डे मैदान सम्म रहेको छ । यसै गरी महिला तर्फ हाफ म्याराथन हुनेछ । महिला तर्फको दौड इलाम बजार–बिब्ल्याटे–धारापानी– माईपोखरी–सातखाल्डे मैदान सम्म २१ दशमलब १ किमी रहेको छ ।म्याराथनमा अन्तराष्ट्रिय धावक समेत सहभागी हुने इलामका नगरपालिकाका नगर प्रमुख केदार थापाले जानकारी दिनु भयो ।
पुरुष तर्फ पहिलो हुनेलाई २ लाख ५० हजार र महिला तर्फ पहिलो हुनेलाई १ लाख रुपियाँ प्रदान गरिनेछ । दुवै समूह तर्फ १० औं स्थान सम्म प्राप्त गर्ने खेलाडीले नगद पुरस्कार पाउने छन ।कार्यक्रमलाई पर्यटन बोर्ड इलाम नगरपालिका , रणसार्दुल गण , बैंक तथा बित्तिय सस्थाले आर्थिक सहयोग गर्ने भएका छन् ।
