इलामको माईजोगमाई गाउँपालिकामा थुम्केरानी महोत्सव हुने भएको छ । पर्यटन प्रर्वद्धनको उद्धेश्यले गाउँपालिकाको सहयोगमा थुम्केरानी तुम्लिङ मेग्मा संरक्षण तथा पर्यटन प्रवद्र्धन समिति माईजोगमाई २ र ६ ले महोत्सव आयोजना गरेको हो ।
महोत्सवमा नेपाल–भारतको सुन्दर दृश्यावलोकनसंगै सांगितिक कार्यक्रम समेत हुनेछ । थुम्केरानीबाट झुल्के घामको दृश्य अवलोकनका साथै १० वटै स्थानीय तह, भारतका विभिन्न ठाउँहरुको दृश्य अवलोकन गर्न सकिन्छ । गाउँपालिकाको केन्द्र नयाँबजार देखि थुम्केरानी, जौबारी, तुम्लिङ्ग, टंङ्लु,मेग्मा सम्मको पैदल यात्रा समेत महोत्सवको आकर्षणको रुपमा रहेको छ ।माघ २२ गतेबाट २४ गतेसम्म महोत्सव चल्नेछ ।
विश्वको तेस्रो अग्लो हिमशृखला, दुर्लभ वन्यजन्तु हाब्रे (रेडपान्ड) ,एसियाको दोस्रो पुरानो मेग्मा गुम्बा अवलोकनको व्यवस्था मिलाइएको छ । महोत्सवमा लोक गायक इन्द्र गुरुङ, पदम राई, विजय मुकारुङ राई,नवीन सुवेदी लगायत स्थानीय कलाकारहरूको प्रस्तुती रहनेछ । मुख्य आकर्षणको रुपमा हास्यकलाकारः– सुबोध गौतम (एदुमे) रहेका छन् ।
एक्सीम्बल ब्यान्डको लाइभ कन्सर्टका साथै विभिन्न जातजातिका कलाकारहरुको झाकी नाच हुनेछ । आन्तरिक एवम बाह्य पर्यटकहरुलाई थुम्केरानीको बारेमा जानकारी दिने उद्धेश्यले महोत्सव आयोजना गरिएको हो । माइजोगमाईस्थित यस थुम्के डाँडामा पछिल्लो समय पर्यटकको चहलपहल बढ्दै गएको अायोजक समितिका अध्यक्ष राजेश थामी बताउँछन् ।
लेकाली जीवजन्तुको अवलोकन, सूर्योदयको मनोरम दृश्यले भरिएको यस क्षेत्रमा दैनिक ५० देखि १०० को हाराहारीमा पर्यटक पुग्ने गरेका छन् ।महोत्सवमा स्थानीय कुरालाई प्राथमिकता दिईने छ।
