फिक्क्ल: इलामको फाल्गुनन्द सुकिलुम्बा विमानस्थलमा नेपाल एयरलाइन्सले साप्ताहिक रुपमा उडान भर्ने भएको छ । माघको पहिलो साताबाट साप्ताहिक रुपमा उडान भर्ने गरी इलाम नगरपालिका र एयरलाइन्स बिच सहमती भएको हो ।
उडानका लागि चाडै मिति तय हुने इलाम नगरपालिकाका नगर प्रमुख केदार थापाले जानकारी दिनु भयो । ‘माघ १ देखि सातामा एक उडान भर्नेे सहमति भएको छ, बार र समयको निश्चित छिटै हुँदै छ’ नगर प्रमुख थापाले भन्नु भयो । उक्त विमानस्थलमा प्रारम्भमा तारा एयरले इलाम नगरपालिकासँगको समन्वयमा उडान गरेको थियो । ताराले यात्रु नपाएको भन्दै गत जेठ महिना देखि एकलौटी रुपमा उडान बन्द गरेको थियो । इलाम नगरपालिकाको पहलमा फेरी नेपाल बायु सेवा निगमले उडान सुचारु गर्ने भएको छ ।
इलाममा पाँचथर ,ताप्लेजुङ सहित भारतको दार्जिलिङ सम्मका यात्रुले सेवा पाउने भएका कारण निगमलाई नियमित उडान गर्न आग्रह गरिएको थापाले बताउनु भयो । पर्यटकीय क्षेत्र इलाम भएका कारण नियमित उडान राख्दा यात्रु पाउन समस्या नहुने नगरपालिकाले जनाएको छ । उक्त विमानस्थलमा गत फागुनमा तारा एयरले उडान गरेको हो । इलामबाट करिब १ घण्टाको उडान अवधिमा काठमाडौं पुगिन्छ ।निगमले भाडादर समेत चाडैै निर्धारण गर्ने छ ।
फाल्गुनन्द विमानस्थ निर्माणको बीस वर्ष पछि धावन मार्ग कालोपत्रे भएको थियो । विमानस्थल कालोपत्रे सम्पन्न भएपछि नेपाल बायु सेवा निगमको ट्वीनटर विमानले परिक्षण उडान गरेको थियो । इलाममा ६७० मिटर लम्बाई र २० मिटर चौडाइको पक्की विमानस्थल बनेको छ । २०५८ सालमै विमानस्थल निर्माणको प्रक्रिया थालिएको भए पनि निर्माण प्रक्रिया २०६८ सालबाट भएको थियो ।
