फिक्कल: इलामको माङ्सेबुङ गाउँपालिका–६ चिसोपानी पञ्चमी स्थित बाँझो स्वास्थ्य चौकीमा विपद् स्वयंसेवक परिचालन आधारभूत तालिम सुरु भएको छ ।सशस्त्र प्रहरी बल नेपाल नं. १ गण हेडक्वाटर श्रीअन्तु इलामको आयोजना तथा माङ्सेबुङ गाउँपालिकाको संयोजनमा तालिम सुरु गरिएको हो।
आगामी २४ गतेसम्म सञ्चालन हुने तालिमको उद्घाटन माङ्सेबुङ गाउँपालिकाका अध्यक्ष हेमन्त राईले गर्नु भयो । कार्यक्रममा प्रमुख जिल्ला अधिकारी लक्ष्मण ढकाल, जिल्ला प्रहरी कार्यालय इलामका प्रमुख कुलदिप चन्द तथा सशस्त्र प्रहरी बल नेपाल नं. १ गण श्रीअन्तु इलामका गणपति (एसपी) केशवराज प्याकुरेल लगायतको उपस्थिति रहेको थियो।
तालिममा २५ जना प्रशिक्षार्थी, ४ जना प्रशिक्षक तथा स्थानीय बासी सहित करिब ७० जनाको सहभागिता रहेको सशस्त्र प्रहरी बल नेपाल नं. १ गण श्रीअन्तु इलामका गणपति (एसपी) प्याकुरेलले जानकारी दिनु भयो । विपद्का समयमा स्वयंसेवक परिचालन, उद्धार, समन्वय तथा प्रारम्भिक व्यवस्थापन सम्बन्धी आधारभूत ज्ञान र सीप प्रदान गर्ने उद्देश्यले तालिम सञ्चालन गरिएको शसस्त्र प्रहरीले जनाएको छ । शसस्त्र प्रहरीले बिपद्को समयमा अग्रपक्तिमा रहेर काम गर्दै आएको छ ।
