फिक्कल: इलामको सूर्योदय नगरपालिका वडा नं. २, पशुपतिनगरमा “पर्यटक मैत्री भावना तथा क्षमता विकास तालिम” कार्यक्रम संचालन गरिएको छ ।पर्यटन कार्यालय काकडभिट्टाको आयोजना तथा सूर्योदय नगरपालिका वडा नं. २ को संयोजनमा नेपाल–भारत सीमाक्षेत्रमा कार्यरत सरकारी तथा गैरसरकारी निकायका कर्मचारीलाई लक्षित गरी “पर्यटक मैत्री भावना तथा क्षमता विकास तालिम” कार्यक्रम संचालन गरिएको हो ।
पर्यटन कार्यालय काकडभिट्टाका कार्यालय प्रमुख छवि खतिवडाको अध्यक्षता तथा सूर्योदय नगरपालिकाका कार्यबहाक नगर प्रमुख दुर्गा कुमार बरालको प्रमुख आतिथ्यतामा सम्पन्न तालिममा कर्मचारी र सरोकारवाला गरी ४४ जनाको सहभागिता रहेको थियो । कार्यक्रममा अध्यागमन कार्यालय कककडभिट्टका तुलसी भट्टराई , पर्यटक प्रहरीका बरिष्ठ सइ मान बहादुर खत्री र पर्यटन कार्यालय काकडभिट्टाका अधिकृत निरोज कट्टेलले सहजीकरण गर्नु भएको थियो ।
कार्यक्रममा कार्यबहाक नगर प्रमुख बरालले सीमाक्षेत्र आवतजावतको नाका मात्र नभई देशको पहिचान, संस्कार र आतिथ्यताको पहिलो झलक भएको बताउनु भयो । उहाले उक्त क्षेत्रमा कार्यरत कर्मचारी नै वास्तविक अर्थमा राष्ट्रका प्रतिनिधि भएको बताउदै पर्यटक प्रति सकारात्मक व्यवहार, सेवा प्रवाहमा सहजता र समन्वयात्मक कार्यशैली जरुरी रहेको बताउनु भयो ।
कार्यक्रममार्फत सहभागीमा सेवामुखी सोच, पेशागत दक्षता तथा पर्यटकप्रति मैत्रीपूर्ण व्यवहार विकास हुने अपेक्षा लिएको छ । पर्यटन प्रवद्र्धनसँगै स्थानीय अर्थतन्त्र सुदृढ बनाउन यस्ता कार्यक्रम प्रभावकारी हुने पर्यटन कार्यालय काकडभिट्टाका प्रमुख खतिवडाले बताउनु भयो । कार्यक्रममा वडा नं. २ का वडाध्यक्ष डिक बहादुर बम्जन सहित सरोकारवालाको सहभागिता रहेको थियो ।
