फिक्कल: इलामको सूर्योदय नगरपालिकाको पर्यटकीय क्षेत्र कन्याममा एनपिएलको ट्रफी आउने भएको छ । नेपाल प्रिमियर लिग (एनपिएल) को दोस्रो संस्करण अन्तर्गत कोशी प्रदेशमा संचालन हुने ट्रफी टुर भदौ २२ गते इलाम समेत आउने भएको हो । भदौ २२ गते बिहान पाथिभरा मन्दिरबाट मेची क्याम्पसमा अवतरण गरिने ट्रफी त्यहाँको क्याम्पस परिसरमा प्रदर्शनी हुनेछ । त्यसपछि मेची पुल र बिर्तामोड हुँदै इलाम प्रवेश गराइनेछ ।
कन्याममा फोटोसुट र विशेष कार्यक्रम गरिनेछ । बिर्तामोड हाइवे ¥याली र वान स्टप मल अगाडि विशेष कार्यक्रम गरेर दमक लग्ने कार्यक्रम तय भएको छ । कोशी प्रदेश क्रिकेट संघका सचिव टिकाराम पुरीले ट्रफी टुरले कोशी प्रदेशमा क्रिकेटको माहोललाई अझ उत्साहपूर्ण बनाउने बताए । उनले इलामका क्रिकेटको उभार आउँदै गरेकाले ट्रफी टुर पर्यटनमा समेत योगदान पुग्ने बताए । पुरीले ट्रफी टुरलाई सफल बनाउन सबै इलामेलीहरु १ बजे कन्याममा भेला हुन अपिल समेत गरेका छन् ।
कार्यक्रमको पहिलो दिन भदौ २१ गते ट्रफी बिराटनगर विमानस्थलमा अवतरण गराइनेछ । त्यसपछि मुख्यमन्त्री कार्यालयमा विशेष प्रदर्शनी आयोजना हुनेछ भने सिदार्थ बैंक लिमिटेडमा पनि ट्रफी देखाइनेछ । बैंक कार्यालयबाट सुरु हुने रोडसेस महेन्द्र चोक, बरगाछी, कन्चनबारी–ठुलो मिल– तीनपैनी हुँदै बिराटनगर बजार, ट्राफिक चोक र संसारीमाई थान पुग्नेछ । साँझ जैन भवनमा विशेष कन्सर्ट समेत आयोजना गरिएको विराटगर किङसका मार्केटिङ मेनेजर भुवनेश प्रताप मल्लले जानकारी दिए ।
भदौ २३ गते दमक हाइवेमा ¥याली गर्दै गोरखा डिपार्टमेन्टर अगाडी विशेष कार्यक्रम गरिनेछ । त्यसपछि सुनसरीमा ट्रफी प्रदर्शन गरिनेछ। दिउँसो बुढीगंगा खोलाबाट सुरु हुने ¥याली इटहरी चोकसम्म पुग्नेछ । त्यसपछि इटहरीको जनता क्याम्पसमा विशेष कार्यक्रम आयोजना हुनेछ । इनरुवा हुँदै ट्रफी दुहबी बाइपासमार्गबाट पुनः बिराटनगर प्रवेश गराइने कार्यक्रम छ ।
नेपाल क्रिकेट संघ (क्यान) ले दोस्रो संस्करणको एनपिएल आगामी १ देखि २७ मंसिरसम्म कीर्तिपुरस्थित त्रिभुवन अन्तर्राष्ट्रिय क्रिकेट मैदानमा गर्दैछ । एनपिएलको पहिलो संस्करण १५ मंसिरदेखि ६ पुस ०८१ मा भएको थियो । एनपिएलको उपाधिका लागि सुदूरपश्चिम रोयल्स, कर्णाली याक्स, लुम्बिनी लायन्स, पोखरा एभेन्जर्स, चितवन राइनोज, काठमान्डु गोर्खाज, विराटनगर किंग्स र जनकपुर बोल्ट्सबिच प्रतिस्पर्धा हुनेछ ।
