इलाम: चैत्र १ गतेबाट हराएकी फाकफोकथुम गाउँपालिका–३ सल्लेरीकी १९ बर्षीया विमला कट्टेलको शव गाडिएको अवस्थामा फेला परेको छ ।हराएको १५ दिन पछि चैत १४ गते उनको शव गाडिएको अवस्थामा फेला परेको जिल्ला प्रहरी कार्यालय इलामका सूचना अधिकारी तथा प्रहरी नायब उपरीक्षक मानबहादुर राईले जानकारी दिनुभयो ।
उहाँका अनुसार, फाकफोकथुम गाउँपालिकाको दुईधार्ने खोप दाहालगोलाई भन्ने स्थानमा विमलाको शव फेला परेको हो । प्रहरीले शव उत्खनन गर्ने र कानुनी प्रक्रिया पुरा गरेर थप अनुसन्धान गर्ने बताएको छ ।इलामको देउमाई नगरपालिका जितपुर माइत रहेकी महिला गएको चैत्र १ गते देखी बेपत्ता भएकी हुन् । विमलाका ससुरा कृष्णलाल गिरीले ०८१ चैत ४ गते प्रहरीमा बुहारी हराएको उजुरी दिएको उल्लेख छ ।
विमलाका श्रीमान् २५ बर्षीया उमेश गिरी बेपत्ता गराउन संलग्न रहेको आशङ्का गरिएको छ । साथै उनलाई प्रहरीले ०८१ चैत १५ गते नियन्त्रणमा लिएको छ । उनको बाल विवाह कहिले र कसरी भयो भन्ने विषय अनुसन्धानको अर्को पाटो रहेको प्रहरीले बताएको छ ।
