इलाम : दसैं, तिहार र छठको बेलामा हुने यात्रुको चापलाई ध्यानमा राखेर जिल्ला ट्राफिक प्रहरी कार्यालय इलामले यात्रु सहायता कक्षा स्थापना गरेको छ। चाडबाडमा हुने भीडभाडमा यात्रुको सहजताका लागि सदरमुकामको बसपार्क र चोक बजारमा रहेको ट्याक्सी स्टेसनमा यात्रु सहायता कक्षा स्थापना गरिएको हो।
यात्राका क्रममा असहजता महसुस भए ती सहायता कक्षामा उजुरी वा गुनासो गर्ने व्यवस्था गरिएको जिल्ला ट्राफिक प्रहरी कार्यालय इलामका प्रमुख डम्बर बिक्रम दियालीले बताउनुभयो।इलाम सदरमुकाममा स्थापना गरिएको यात्रु सहायता कक्ष बुधबार प्रमुख जिल्ला अधिकारी कल्पना श्रेष्ठले उद्घाटन गर्नुभयो । यात्रु सहायता कक्षामार्फत ट्राफिक नियम सचेतना गराउने, क्षमताभन्दा बढी यात्रु राखेको, तोकिएभन्दा बढी भाडा लिएको विषयमा चेकजाँच गर्ने प्रमुख दियालीले बताउनुभयो ।
‘चाडवाडका समयमा यात्रुको चाप बढी हुन्छ। ओभरलोड गरिएको हुन सक्छ। बढि भाडा असुलिएको हुन सक्छ। यात्रुको सामान छुट्न सक्छ,’ उनले भने, ‘यात्राका क्रममा कसैलाई समस्या भएको अवस्थामा सहजताका साथ प्रहरी सेवा उपलव्ध गराउन सहायता कक्ष सुरु गरिएको हो। त्यहाँबाट चौबिसै घण्टा सेवा दिने व्यवस्था मिलाइएको छ।’
