विराटनगर :कोशी प्रदेश सभाको बैठक अनिश्चितकालका लागि स्थगित भएको छ ।प्रदेश सभाको अध्यक्षता गरिरहेका इस्राइल मन्सुरीले बैठकको प्रारम्भ गर्नासाथ प्रमुख प्रतिपक्ष नेकपा एमाले र राप्रपाका प्रदेश सभा सदस्यहरूले उठेर विरोध गरेका थिए ।
राप्रपा संसदीय दलका नेता भक्तिप्रसाद सिटौला र एमालेका प्रदेश सभा सदस्य तिलकुमार मेन्याङ्बो लिम्बूले भदौ ४ गते अमर्यादित तथा संसदीय परम्परामा कहीँ कतै नभएको घटना भएको र सभाको अध्यक्षता गरेको व्यक्तिले संविधान उल्लंघन गरेको धारणा राखेका थिए ।
मन्सुरीबाट संविधान उल्लंघन गर्ने काम भएको र पुनस् गैरसंवैधानिक काम हुन सक्छन् भन्ने आशंका भएकाले आफूहरूले प्रदेश सभाको बैठक बहिष्कार गरेको जानकारी गराएर बैठक कक्षबाट बाहिरिएका थिए ।
प्रमुख प्रतिपक्षलगायत प्रतिपक्षका सबै प्रदेश सभा सदस्यहरू नाराबाजी गर्दै बैठक कक्षबाट बाहिरिएपछि सभाको अध्यक्षता गरेका मन्सुरीले अनिश्चितकालका लागि प्रदेश सभा बैठक स्थगित गरेका छन् ।
प्रदेश सभाको कार्यव्यवस्था परामर्श समितिले प्रदेश निजामती सेवा ऐन, २०७९ लाई संशोधन गर्न बनेको विधेयक र स्थानीय सेवाको गठन सञ्चालन र सेवाका सर्तहरू सम्बन्धमा व्यवस्था गर्न बनेको विधेयक प्रस्ताव स्वरुप सभामा पेस गर्ने कार्यसूची बनाएको थियो । तर, प्रतिपक्षको बहिष्कारका कारण उक्त प्रस्ताव प्रदेश सभामा पेस हुन सकेन ।
कार्यव्यवस्था परामर्श समितिको बैठकले राप्रपा र नेकपा एमालेलाई प्रारम्भमा बोल्न दिने कार्यसूची तय गरेको थियो । तर पछि मुख्यमन्त्री उद्धव थापाले बोल्न नदिन निर्देशन गरेपछि एमाले र राप्रपालाई बोल्न दिने समय कार्यसूचीबाट हटाइयो । सभामुखले बोल्न नदिने भएपछि एमाले र राप्रपाले बैठक प्रारम्भ हुनासाथ आफ्नो ठाउँबाट उठेर आफ्ना कुरा राखी बैठक बहिष्कार गरेका हुन् ।कान्तिपुर टिभीबाट
