फिक्कल: इलामको सूर्योदय नगरपालिका १० फिक्कलमा संचालित पार्वती मेडिकोले जिल्ला प्रशासन कार्यालय इलामलाई दुई लाख जरिवाना बुझाएको छ ।इलामका सहायक प्रमुख जिल्ला अधिकारी ध्रुव कोईरालाको नेतृत्वको टोलीले अनुगमन गर्दा प्रतिबन्धित बेटाडिन बिक्री बितरण गरिएको पाईए पछि तीन दिन अघि दुई लाख रुपियाँ जरिवाना तोकेको थियो ।
मेडिकोका अशोक यादवले आईतबार जिल्ला प्रशासन कार्यालय इलाममा तोकीएको जरिवाना बुझाएको सहायक प्रजिअ कोईरालाले जानकारी दिनु भयो । संचालकले आफनो नाममा दर्ता कायम रहेका कागजपत्र समेत पेश गर्ने प्रतिवद्धता जनाए पछि मेडिको खोल्न दिईएको छ । यस अघि आफनो नाममा दर्ता कायम रहेको कागजपत्र नभएकाले मेडिको बन्द गर्न निर्देशन दिईएको थियो ।
अनुगमनका क्रममा उक्त मेडिकोमा फर हस्पिटल सप्लाई वनली लेखिएको बेटाडिन ५ बोतल बिक्रीका लागि राखीएको पाईए पछि जरिवाना गरिएको तोकीएको थियो । उक्त बेटाडिन सरकारी अस्पतालले मात्र प्रयोग गर्न पाउछन । सहायक प्रजिअका अनुसार उक्त मेडिकोलाई उपभोक्ता हित संरक्षण ऐन २०७५ को दर्फा ३८(ङ) र उक्त ऐनको दर्फा ३९(१) (क) अनुसार जरिवाना गरी सात दिन भित्रमा जिल्ला प्रशासन कार्यालयमा उपस्थित हुन निर्देशन दिएको थियो ।
पछिल्लो समय जिल्ला प्रशासन कार्यालय इलामले जिल्लामा संचालित मेडिकलको अनुगमन गरिरहेको छ । इलाम बजारका केहि मेडिकललाई यस अघि जरिवाना गरेको थियो ।
