फिक्कल: इलामको रोङ गाउँपालिकामा रहेको बहिनी पाथीभरा मन्दिरमा एक बर्षको अवधिमा एक करोड ६६ लाख रुपियाँ भेटी संकलन भएको छ । आर्थिक बर्ष २०८०/०८१ को साउन १ गते देखि असार ३१ गते सम्ममा दाताले चढाएको र सहयोग रकम गणना गर्दा एक करोड ६६ लाख रुपियाँ जम्मा भएको हो ।
रोङ गाउँपालिकाले कानुन निर्माण गरी मन्दिरलाई आफनो स्वामित्वमा ल्याएर ब्यवस्थित गरेपछि रकम जम्मा हुँनेक्रम बढेको पाथीभरा मन्दिर संरक्षण तथा व्यवस्थापन समितिका अध्यक्ष दिलिपकुमार राईले जानकारी दिनु भयो । स्वदेश तथा बिदेशबाट मन्दिर दर्शन गर्न आउने भक्तजनले चढाएको भेटी तथा बिभिन्न दाताले गरेको सहयोगबाट उक्त अवधिमा एक करोड ५६ लाख ६१ हजार चार सय ८८ रुपियाँ नगद र नौ लाख ९९ हजार ५ सय आठ रुपियाँ बराबरको जिन्सी संकलन भएको अध्यक्ष राईले जानकारी दिनु भयो । जिन्सी अन्र्तगत सुन, चाँदी पित्तल लगायतका धातु संकलन भएको छ ।
समितिका अनसरा साउन महिनामा चार लाख ४२ हजार पाँचसय नगद र २१ हजार बराबरको जिन्सी संकलन भएको थियो । भदौमा सात लाख ५६ हजार एक सय ७४ नगद र ६९ हजार चार सय बराबरको जिन्सी, असोजमा पाँच लाख ७० हजार तीन सय ८७ नगद र ६७ हजार नौ सय बराबरको जिन्सी र कात्तिकमा २१ लाख १० हजार चार सय ७५ नगद र ७५ हजार चार सय बराबरको जिन्सी सकलन भएको थियो ।
मङ्सिरमा १८ लाख ३२ हजार ५७ नगद र ८६ हजार आठ सय बराबरको जिन्सी, पुसमा १५ लाख ३७ हजार आठ सय ५४ नगद र ४० हजार नौ सय बराबरको जिन्सी, माघमा १२ लाख ५४ हजार पाँच सय ३५ नगद र २८ हजार दुईसय बराबरको जिन्सी र फागुनमा १४ लाख ५५ हजार एक सय ४४ नगद र एक लाख २२ हजार चार सय आठ बराबरको जिन्सी संकलन भएको थियो ।यसैगरी चैतमा १९ लाख ३६ हजार दुई सय ६६ नगद र एक लाख ६७ हजार बराबरको जिन्सी, वैशाखमा २० लाख २४ हजार चारसय ५७ नगद र दुई लाख बराबरको जिन्सी, जेठमा १० लाख ७३ हजार पाँचसय ३७ नगद र ६९ हजार पाँचसय बराबरको जिन्सी र असारमा छ लाख ६८ हजार १४ नगद र ५२ हजार बराबरको जिन्सी संकलन भएको थियो ।
मन्दिरमा आम्दानी बढे संगै गाउँपालिकाले साना तथा मझौता ब्यवसायीका लागि सटर निर्माण गरेको छ । पालिकाले सीढी बनाउने देखि मन्दिरको सजावटको काम गरीरहेको छ । गाउँपालिका अध्यक्ष मनिकुमार स्याङबोले मन्दिरलाई पुनःनिर्माण गरी प्यागोडा शैलिमा निर्माण गर्ने जानकारी दिनु भयो । मन्दिरमा अहिले अनियमितता हुँन नदिन सीसी टिभी जडान गरीएको छ । नयाँ समितिले मन्दिरको आम्दानी अनलाईन मार्फत इन्ट्री गर्ने गरेको छ ।
पुरानो समसतले मन्दिरको रकम हिनामिना गरेको भन्दै जिल्ला प्रशासन कार्यालय इलामले छानविन गरेको थियो । छानविन गर्दा लाखौ रुपियाँ हिनामिना भएको पुष्टि भएको थियो । जिल्ला प्रशासनले छाविन गरी प्रतिवेदन सार्वजनिक गरे पनि रकम असुलउपर गर्न सकेको थिएन । उक्त बिषय अख्तियारमा मुद्दा परेपछि अख्तियारले हेर्ने भए पछि अलमलमा परेको थियो ।
