फिक्क्ल्: नेपाल–भारत सीमानाको पशुपतिनगर देखि मानेभञ्ज्याङ जोड्ने सडकको उद्धघाटन गरिएको छ । ३ करोड ७१ लाख रुपैया लागतमा निर्माण थालिएको सूर्योदय नगरपालिका वडा नं २ को पशुपतीनगर बजार देखि वडा नं १ नेपाल भारत सीमामा रहेको मानेभञ्ज्याङ बजार सम्मको पहिलो चरणको ढलानको काम सम्पन्न भई सडक उद्घाटन गरीएको हो ।
सडक निर्माणपछि आफ्नै जिल्लाको अर्को गाउँ पुग्न पनि भारतीय भू–भाग भएर जानुपर्ने बाध्यता अन्त्य हुने भएको छ । बिहिबार एक कार्यक्रमका बिच सूर्योदय नगरपालिकाका नगर प्रमुख रणबहादुर राईले सडक उद्धघाटन गर्नु भयो । उद्धघाटन कार्यक्रममा सूर्योदय वडा नं ३ का अध्यक्ष लोकबहादुर प्रधान, सूर्योदय–२ का निवर्तमान वडाध्यक्ष चन्द्र सुब्बा, नेकपा एकिकृत समाजवादी सूर्योदय अध्यक्ष कमल गदाल, नेपाली कांग्रेसका नेता हिमाल मास्के लगायतको उपस्थिती रहेको थियो ।
संघीय सरकार, प्रदेश सरकार र सूर्योदय नगरपालिकाको समन्वयमा डिभिजन सडक कार्यालयले १ हजार २ सय मिटरको सडक ढलानको कार्य गरेको छ । सो सडक खण्ड सूर्योदय नगरपालिकाको पशुपतीनगर हुँदै पाँचथरसम्म जोड्ने रिङ रोड अन्र्तगत पर्छ ।
सडक निर्माणको जिम्मा भगवती बौद्ध सोहिना जेभीले लिएको थियो । असार २० सम्ममा सम्पन्न गर्ने गरी गत चैत २० मा सडकको ठेक्का लागेको थियो । अब आन्तरिक पर्यटकलाई नेपाली भु–भाग हुँदै प्रसिद्ध चित्रेगुम्बा लगायत उच्च पहाडी क्षेत्रका दर्जनौं पर्यटकीयस्थल पुग्नसमेत सहज हुने भएको छ ।
