फिक्कल: १३ औ राष्ट्रपति रनिङ शिल्डमा सहभागी सूर्योदय नगरपालिकाका खेलाडीहरुलाई स्वागत तथा सम्मान गरिएको छ । प्रतियोगितामा ६ स्वर्ण, ६ रजत, १० काँस्य पदक प्राप्त गरि तेश्रो स्थान हासिल गरेको सहभागी खेलाडी र अफिसियलहरुलाई नगर प्रमुख रणबहादुर राई, प्रमुख प्रशासकिय अधिकृत मिलन भट्टराई लगायतले अबिर र खदा लगाएर सम्मान गरेका हुन् ।
सूर्योदयले कराते, एथ्लेटिक्स, कबड्डी लगायतका खेलमा पदक जितेको छ । नगरले करातेमा प्रथम, कबड्डीमा दोश्रो तथा तेक्वान्दोमा तेश्रो स्थान हासिल गरेको छ । प्रतियोगितामा प्राप्त ट्रफी नगर प्रमुखलाई हस्तान्तरण गरिएको छ । खेलाडीहरुले प्रतियोगितामा नयाँ खेलको रुपमा समावेश भएको रग्बी खेलको समेत अनुभव लिएका छन् ।
नगर खेलकुद विकास समितिका संयोजक शौरभ आचार्यले खेलकुदमा नगरको लगानीका कारण उपलब्धी हासिल भएको बताए । उनले नगरबाट सहभागी विद्याथीहरुले नयाँ खेलको रुपमा राष्ट्रपति रनिङ शिल्डमा रग्बी खेलको बारेमा जानकारी लिन पाएको बताए ।
नगर प्रमुख रणबहादुर राईले खेलाडीहरुलाई हौसला प्रदान गर्दै आगामी बर्षृ अझ उत्कृष्ट नतिजाका लागि शुभकामना दिए । उनले सफल आयोजनाका निम्ती जिल्ला खेलकुद विकास समितिलाई धन्यवाद समेत ज्ञापन गरे । कार्यक्रम नगर शिक्षा शाखाका प्राविधिक नविनराज पौडेलले संचालन गरेका थिए ।
