फिक्कल: इलामको रोङ गाउँपालिकामा आइतबार पनि कार्यालय खुल्ने भएको छ । आइतबार बिदा दिएर कार्यालय ९ बजे खोल्ने संघीय सरकारको निर्णय पछि हाल सम्म गाउँपालिकामा १० बजे अगाडि एकै जना सेवाग्राही नआएको भन्दै गाउँपालिकाले आइतबार कार्यालय संचालन गर्ने निर्णय गरेको हो ।
गाउँपालिकाको जेष्ठ ४ गतेको कार्यपालिका बैठकको निर्णय बमोजिम जेष्ठ ६ गतेबाट लागू हुने गरी सामुदायिक बिधालय बाहेक अन्य कार्यलय पुरानै समय तालिकामा संचालन गर्ने निर्णय गरेको गाउँपालिका अध्यक्ष मनिकुमार स्याङबोले जानकारी दिनु भयो । अध्यक्ष स्याङबोले असार मसान्त गाउँपालिकाले निर्धारण गरेको समय तालिकामा कार्यालय खोलने र असार मसान्त पछि पुनःबिचार गरी निर्णय गरीने जानकारी गराउनु भयो ।
गाउँपालिकाले असार मसान्त सम्ममा सम्पन्न गर्नु पर्ने धेरै योजनाहरु रहेको हप्तामा दुई दिन नियमित बिदा हुँदा काम सम्पन्न गर्न समय अभाब भएका कारण आइतबार कार्यालय खोल्ने निर्णय गरेको जनाएको छ । भौगोलिक बिकटताका कारण बिहान ९ बजे कार्यालय आउन कर्मचारीलाई समेत समस्या गर्दै आएको गाउँपालिकाले जनाएको छ ।
