फिक्कल: इलामको सूर्योदय नगरपालिका ३ बौद्धधाममा निर्माण गरिएको बुद्धको प्रतिमा सहितको बुद्धपार्कको उद्घाटन गरि संगै संचालनमा आएको छ । कोशी प्रदेश सरकार , संघीय सरकार र सूर्योदय नगरपालिकाको लगानीमा निर्माण भएको ६५ फिट अग्लो बुद्धको प्रतिमा सहितको पार्कको बुधबार कोशी प्रदेशका मुख्यमन्त्री हिकमत कुमार कार्कीले उद्घाटन गरे संगै संचालनमा आएको हो ।
६५ फिट अग्लो बुद्धको प्रतिमा सहित १७ रोपनी क्षेत्रफलमा निर्माण भएको पार्क उद्घाटन संगै पर्यटकका लागि खुल्ला गरिएको छ ।
पार्क उद्घाटन अघि धर्म गुरु खेन्छेन नाम्डोल छेरिङ रिम्पोछे सहितका धर्म गुरुबाट प्राण प्रतिष्ठान गरिएको थियो । १७ रोपनी क्षेत्रफलमा निर्माण भएको पार्क नेपाल , भारत लगायत तेस्रो देशका पर्यटकका लागि प्रमुख गन्तब्य भएको गौतम बुद्ध स्मृति प्रतिष्ठानका अध्यक्ष लाकेल लामाले जानकारी दिनु भयो । नेपाल भारत सीमा क्षेत्र पशुपतिनगरबाट २ किलोमिटरको दूरीमा रहेको बौद्धधाममा अहिले भारतीय पर्यटकको आकर्षणको केन्द्र बनेको छ ।
सूर्योदय नगरपालिकाका कार्यबहाक नगर प्रमुख दुर्गा कुमार बरालले उक्त पार्क संचालनमा आएपछि सूर्योदय नगरपालिका भित्र अर्को पर्यटकीय गन्तब्य थपिएको बताउदै स्थानीय पर्यटन प्रवर्धन संगै आर्थिक आयआर्जन समेत बढने बताउनु भयो । उक्त पार्क संगै स्थानीय पर्यटन ब्यवसायीले समेत अन्य पर्यटकीय संरचना निर्माण गरेका छन ।
धर्म गुरु खेन्छेन नाम्डोल छेरिङ रिम्पोछेले धार्मीका आस्था राख्ने बिश्वका मानव समुदायका लागि उक्त पार्क उत्कृष्ठ गन्तब्य भएको बताउनु भयो । उहाले बुद्ध शान्तिका अनुयायी भएकाले उक्त स्थान सहित बिश्वमा शान्तिको शन्देश दिन उक्त पार्क आगामी दिनमा सावित बन्ने बताउनु भयो ।
बुद्धपार्क निर्माणको थालनी मेची पर्यटन प्रवद्र्धन विकास समितिको बजेटबाट आर्थिक वर्ष २०७२÷०७३ मा भएको थियो । क्रमागत रुपमा संचालन हुँदै आएको आयोजना देश संघीय संरचनामा गएपछि संघीय सरकार ,कोशी प्रदेश सरकार र सूर्योदय नगरपालिकाको ८ करोड हाराहारी रकममा निर्माण गरेको थियो ।
कोशी प्रदेश सरकारले आर्थिक वर्ष २०७५÷०७६ बाट बजेट बिनियोजन गर्दै आएको थियो । सूर्योदय नगरपालिकाले प्रदेशको बजेटमा ३० प्रतिशत थप गरि पार्क निर्माण गरेको थियो ।निर्माण भएको ६५ फिट अग्लो बुद्धको प्रतिमा सहितको पार्क निर्माण थालिएको ११ बर्षमा संचालनमा आएको छ ।
