पशुपतिनगर(इलाम) नेपाली नयाँ बर्ष २०८२ को अवसरमा नेपालका लागि बिभिन्न देशका राजदुत इलामको अन्तु आउने भए पछि अन्तु र कन्याम सिंगारिएको छ । परराष्ट्र मन्त्रालय र नेपाल टुरिजम बोर्डको आयोजना तथा इलामको सूर्योदय नगरपालिकाको समन्वयमा अनौपचारिक भ्रमण अन्र्तगत यहि चैत ३१ देखि २०८२ बैशाख १ र २ बिभिन्न देशका राजदुत अन्तु आउने भए पछि नगरपालिकाले अन्तु कन्यामको सरसफाई सहित सिंगारने काम भैरहेको हो ।
मन्त्रालयले बार्षिक रुपमा बिभिन्न देशका नेपालमा रहनु भएका राजदुतलाई नयाँ बर्षको अवसरमा नयाँ पर्यटकीय गन्तब्यमा भ्रमण गरायने कार्यक्रम अनुसार यसपटक सूर्योदय नगरपालिकाको अन्तुमा र कन्याममा कार्यक्रम तय भएको सूर्योदय नगरपालिकाका नगर प्रमुख रण बहादुर राईले जानकारी दिनु भयो। उक्त कार्यक्रममा परराष्ट्र मन्त्री डा. आरजु राणा देउवाको नेतृत्वमा , मन्त्रालयका सचिव सहितका कर्मचारी, टुरिजम बोर्डका कर्मचारी , राजदुत सहित ४५ जना बढी उच्च तहका पदाधिकारीको सहभागिता रहने छ । परराष्ट्र मन्त्री डा. राणा सहित राजदुत आउने भए पछि यतिबेला कन्याम र अन्तुको सरसफाई संगै सिंगारने काम भैहरको छ ।
कन्याममा ३१ गते राजदुतको स्वागत संगै चियाको स्वाद चखाने र घोडचढी गर्ने कार्यक्रम राखीएको छ । बिभिन्न जातजातीको भेषभुषामा सजाएर राजदुतलाई छिपिटार सम्म घोडामा चढाएर लगिने नगरपालिकाले जनाएको छ । ४० बढी घोडा राजदुतको स्वागतमा घोडचढी गराउनका लागि तयार गरीएको छ । उक्त अवसरमा कन्याममा निर्माण भएको चिया परीक्ष्ण केन्द्रमा बिभिन्न प्रकारका चियाका स्वाद राजदुत सहितका पाहुनालाई चखाउने कार्यक्रम नगरपालिकाले तय गरेको छ ।
राई , लाप्चा र नेवारी नृत्य सहित साकेला नाच, झाक्री नाचले स्वागत गर्दै अन्तु लगेर बैशाख १ गते सूर्योदयको दृश्यावलोकन गर्ने , चिया टिपाईको अनुभव गराउने , अन्तु पोखरीमा फिसिङ(माछा मार्ने) गराउने र इलाममा उत्पादन भएको चियाका भिन्नि जातको परीक्षण गराउने कार्यक्रम छ ।
कार्यक्रममा इजिप्ट, दक्षिण कोरीया, युके,स्वीटजल्याण्ड,थाइल्याण्ड, अष्टे«लिया, फ्रेन्स रिपब्लिक, इजरायल , जापान , मलेसीया, श्रीलंका, बंगलादेश र इसीमोडका राजदुत आउने कार्यक्रम तय भैसकेको नगरका प्रमुख प्रशासकीय अधिकृत अमृत बहादुर राईले जानकारी दिनु भयो ।
नगरले राजदुत सहितको टोली आउने भए पछि नगर उप प्रमुख दुर्गा कुमार बरालको संयोजक्त्वमा मुल समारोह समिति गठन गरी बिभिन्न उप समिति बनाएर स्वागत सत्कारका लागि तयारी गरीरहेको छ । नगर उप प्रमुख बरालले पाहुनाको स्वागत सत्कारमा सरसफाई देखि स्वागत सत्कारका बिभिन्न तयारी भैरहेको जानकारी दिनु भयो । अन्तु क्षेत्रमा स्थानीयको संघ संस्थाको सहयोगमा सरसफाई सहितका कार्यक्रम भैहरेका छन ।
स्वदेशी तथा बिदेशी पर्यटकको बाह्ै महिना भिड लाग्ने अन्तु र कन्याममा राजदुतको भ्रमणले थप प्रचारमा सहयोग पुग्ने नगर प्रमुख रण बहादुर राईले जानकारी दिनु भयो । उहाले भन्नु भयो‘राजदुतको यो भ्रमणले अन्तु , कन्याम सहितका पर्यटकीय स्थलको थप प्रचार प्रसार हुने छ ।’ नगर प्रमुख राईले राजदुतको उक्त भ्रमणले कोशी प्रदेश सरकारले घोषणा गरेको पर्यटन भ्रमण बर्ष सफल पार्न समेत सहयोग पुग्ने बताउनु भयो । राजदुतको उक्त भ्रमण अनौपचारीक भएको नगरपालिकाले जनाएको छ । गोरखापत्र अनलाईन
