इलाम : इलामको देउमाइ नगरपालिकामा १० करोडको लगानीमा फनपार्क र रिसोट सहितको गाई फार्म खुल्ने भएको छ । पुवाखोलाको किनारमा करिब ५० रोपनीको जग्गामा पार्कसहितको रिसोर्ट र गाई फार्म खुल्न लागेको हो ।
दैनिक पर्यटक बढ्न थालेपछि आन्तरिक तथा बाह्य पर्यटकलाई लक्षित गरेर फनपार्क खुल्न लागेको हो । देउमाई नगरपालिकाको वडा नं ६ मा स्थानिय मानबहादुर घिमिरेले इलाममा रहेका पर्यटकीय क्षेत्रमा घुम्न आउने पर्यटकलाई थप उत्साह प्रदान गर्ने उद्धेश्यले फनपार्क र रिसोर्ट सहितको गाई फार्म निमार्णको काम थालिएको जानकारी दिनुभयो । स्विमिङ्ग पुलसहित पोखरीमा डुङ्गा सयर र फिसिङ्ग गर्न पाइने सेवा सहितको रिसोर्ट र एक सय बटा भन्दा बढि गाई रहने गरि फार्म सञ्चालनमा ल्याउन लागिएको सञ्चालक घिमिरेले बताउनुभयो ।
घिमिरेले कम्पनी नै दर्ता गरेर यो योजना संचालन गर्नका लागि अहिले भौतिक संरचना निमार्णको काम सुरु भइसकोको बताउनुभएको छ । गत जेठ महिनाबाट निर्माणको काम थालिएकोमा अहिले पोखरी निमार्ण,गाई फार्म संचालन गर्न ५० वटा गाई आट्ने आधुनिक गोठ र आवास निमार्णको काम अन्तिम चरणमा पुगेको उहाँको भनाई छ । अबको ६ महिना भित्रमा सम्पुर्ण निमार्णको काम सक्ने गरि दुर्त गतिमा काम भईरहेको समेत घिमिरेले बताउनुभयो ।
निर्माण सम्पन्न भएपछि बिभिन्न नेपाली परिकारका खाना, गाई फार्मको अवलोकन, पाखरीमा डुंगा सयर, पानीको फोहोरासहितको सेल्फी पौइन्ट र सुइमिङ गर्ने ब्यबस्था समेत मिलाइने उहाँले बताउनुभयो । स्थानीय स्तरमै उत्पादित खाद्यान्तलाई जोड दिने बताईएको छ ।
“चिल पोखरी पार्क” नाम दिईएको उक्त स्थानमा पर्यटकका लागि ६ महिना भित्रमा सञ्चालनमा ल्याईने घिमिरेले बताउनुभयो । फनपार्क सहितको फार्र्मका लागि पोखरीलाई घेराबार गर्ने, बाटो बनाउने लगायतका अन्य संरचना बनाउन थालिएको छ । २० बर्ष सरकारी सेवामा बिताईसक्नुभएका घिमिरेले आफ्नो एकल लगानीका यो योजना संचालन गरिरहनुभएको हो । उमेरको हिसाबमा ६० हाराहरी पुग्नुभएका घिमिरे स्वदेशमा नै केही गरौ भनेर अहिले कम्मर कसेर लागिरहनु भएको छ । इलाम सदरमुकामबाट नजिकै पर्ने यो स्थान सम्म पुग्न दुई पाग्रे र ४ पाग्रे सबारी लिएरै जान सकिने छ । इलामको चुरेघाटी, तोरीबारी पुवाखोला हुँदै चिलपोखरी पार्कसम्म पुग्न सकिनेछ ।(प्रकाश नेपाल हिमालय टाइम्स)
