फिक्कल: पर्यटकको ओइरो लाग्ने इलामको पर्यटकीय स्थल अन्तुमा संचालित होमस्टे, होटल तथा कटेजको स्तरीकरणको काम थालिएको छ ।
खाद्य प्रबिधि तथा गुण नियन्त्रण डिभिजन कार्यालयले अन्तुमा संचालित होमस्टे, होटल तथा कटेजको बर्गीकरण गरी स्तरीकरणको काम थालेको हो ।
बिभागले होटल संचालकलाई स्वच्छता सम्बन्धि तालिम समेत दिईएको छ । बिभागले १७ वटा होटलमा पहिलो चरणमा नमुनाका रुपमा अनुगमन गर्दा ९ वटाले मात्र स्टीकर पाएका छन । बिभागले बर्गीकरण गरी स्टीकर टाँसेको अन्तु पर्यटन ब्यवसायी संघका अध्यक्ष रुद्र घिमिरेले जानकारी दिनु भयो ।
खाद्य प्रबिधि तथा गुण नियन्त्रण डिभिजन कार्यालय बिराटनगर, र भद्रपुरले संयुक्त रुपमा होटलको स्तरीकरणको काम थालेको भद्रपुर कार्यालय प्रमुख सुभाषचन्द्र वस्तीेले जानकारी दिनु भयो । उहाका अनुसार पहिलो चरणमा अन्तुका होटल तथा होमस्टेमा भद्रपुर कार्यालयले खाद्य स्वच्छता सम्बन्धी तालिम दिएको छ । बिराटनगर कार्यालयले होटलको गुणस्तर हेरी स्टीकर टाँसेको छ ।
बिभागले गुणस्तरको आधारमा ४ प्रकारले होटलमा स्टीकर टाँस्ने गरेको छ । सामान्य होटलमा पहेलो स्टीकर, सन्तोषजनक अवस्थाको होटलमा एक स्टार स्टीकर, उत्तम खाल्को होटलमा दुई स्टार स्टीकर र अति उत्तम होटलमा हरीयो रङको तीन स्टार स्टीकर टाँस्ने गरेको छ ।
भद्रपुर कार्यालय प्रमुख वस्तीले अन्तुका होटलमा खाद्य स्वच्छता सम्बन्धी मापदण्ड पुरा भएकै अवस्थामा भेटीको जानकारी दिनु भयो । उहाले अन्तुका अधिकांश होटलले भान्सा कोठा उपभोक्ताले देख्ने नै गरी बनाएको पाईएको जानकारी दिनु भयो ।
अन्तु पर्यटन ब्यवसायी संघका अध्यक्ष घिमिरेका अनुासर अन्तुमा ६३ वटा होमस्टे र सानाठूला मझौला गरी ७२ वटा होटल कटेज रहेका छन । सूर्योदयको दृश्यावलोकन गर्नका लागि अन्तुमा स्वदेशी पर्यटकको घुईचो लाग्ने गरेको छ । घिमिरेले पर्यटकको आवागमन संगै होटल, होमस्टेको गुणस्तर समेत कायम राख्न बर्गीकरण थप सहज हुने बताउनु भयो ।
अन्तुमा सूर्योदयको दृश्यावलोकनका लागि पर्यटक आउने गरेका छन । बिशेष गरी शुक्रबार र शनिबार अन्तुमा पर्यटकको ओईरो लाग्ने गरेको छ । सूर्योदय नगरपालिकाले अन्तुलाई थप ब्यवस्थित गर्न बिभिन्न पूर्वाधारका काम समेत गरीरहेको छ ।
