फिक्कल: इलामको माई र जोगमाई खोलाको दोभानमा पर्ने माइबेनीमा मकर मेला शुरु भएको छ । आज बिहानैबाट माईजोगमाईको दोभानमा मकर नुहाउनेको भिड लागेको हो । यहाँ मकर स्नान गर्दा सबै पाप हरण हुने धार्मिक विश्वासका साथ सर्वसाधारण माइबेनी मेलामा मकर नुहाउन आउने गरेका छन् । माईजोगमाई गाउँपालिका र इलाम नगरपालिकाको संगम स्थलमा पर्ने बेनीमा मेला लगाउनका लागि केहि दिन अघि देखि नै स्थानीय मेला आयोजक समितिले पहल गरेको थियो । मेलामा स्वदेशी र छिमेकी देश भारतबाट आएका भक्तजनको घुईचो लागेको छ ।
माईमा स्नान गर्न इलाम सहित छिमेकी जिल्ला पाँचथर, ताप्लेजुङ, झापा सहित छिमेकी देश भारतको दार्जिलिङ, सिक्किम, मिरिकबाट हजारौँ सर्वसाधारण आउने गरेका छन् । कोरोना महामारीका कारण बिगतका बर्षहरुमा मेला लाग्न पाएको थिएन । मेलामा स्थानीयले उखु, सुन्तला, तरूल बिक्रीका लागि राखेका छन् । उक्त मेलामा उखु, तरुल, राडीपाखी र भाडावर्तनको अत्यधिक ब्यपार हुँने गरेको छ । माईजोगमाई गाउँपालिकाका अध्यक्ष कुशबहादुर थेवेले धार्मीक पर्यटन प्रवर्धन गर्नका लागि मेलाले महत्वपूर्ण सहयोग पुग्ने बताउनु भयो ।
मकर सघ्राान्तिका दिन पवित्र नदीमा गएर मकर स्नान गर्ने हिन्दुहरूको धार्मिक प्रचलन भए पनि माइबेनीमा संस्थागत रूपमा मेला लगाउने कार्य तत्कालिन बडाहाकिम गजराजसिंह थापाको पालादेखि सुरु भएको पाइन्छ । विसं १९२० देखि संस्थागत रूपमा माइबेनी मेला लगाउन सुरुवात भएको बताइन्छ। पहिलेपहिले ताप्लेजुङदेखि राडीपाखी, गलैँचा लिएर आउने व्यापारी मेलाबाट फर्कँदा भोटेघोडा बिक्री गरेर जाने गरेको स्थानीय अग्रजहरुको भनाई छ ।
