फिक्कल: इलामको सूर्याेदय नगरपालिकाको आगामी आर्थिक वर्ष २०८०/८१ का लागि नीति तथा कार्यक्रम प्रस्तुत भएको छ । शुक्रबार शुरू भएको नगरसभाको १३ औं नगरसभामा नगर प्रमुख रणबहादुर राइले नीति तथा कार्यक्रम प्रस्तुत गर्नु भएको हो ।
स्थानीय तहको योजन तर्जुमा दिगदर्शनमा भएको व्यवस्था बमोजिम बैशाखमा नै नीति कार्यक्रम सभामा पेश गरिको छ । यस अघि नीति कार्यक्रम र बजेट एउटै सभामा पेश हुने गरेको थियो । समयमा नीति कार्यक्रम पेश भएपछि नीति अनुसारको बजेट बनाउन सहज नगर प्रमुख राईले जानकारी दिनु भयो ।
सभामा सूर्याेदय नगरपालिकाको उपभोक्ता हित संरक्षण पहिलो संशोधन विधेयक पेश भएको छ । नगर उपप्रमुख दूर्गाकुमार बरालले संशोधन विधेयक सभामा प्रस्तुत गर्नु भएको छ । नगरसभालाई कोशी प्रदेश प्रमुख पर्शुराम खापुङ र प्रदेशसभा सदस्य खिनुलङवा लिम्बुले सम्बोधन गर्नु भएको थियो । प्रदेश प्रमुख खापुङले स्थानीय तहलाई बलियो बनाउनु पर्ने बताउनु भयो । उहाले स्थानीय तहमा कानुनी भूमीका प्रस्ट नभए संविधानले लिएको लक्ष्य पूरा गर्न नसकिने पनि बताउनु भयो ।
प्रदेशसभा सदस्य खिनु लङवाले रोङ ,सूर्याेदय र माईजोगमाई गाउँपालिका कुनैपनि पर्यटकीय कोरिडोरमा नपर्ने भएकाले यस क्षेत्रको पर्यटन क्षेत्र प्रभावित हुनसक्ने चिन्ता व्यक्त गर्नु भयो । उहाले पर्यटन विकासको लागि एकीकृत पर्यटन योजना बनाई अन्य पालिका संगै सन्दकपुर क्षेत्रको विकासमा जोड दिनु पर्ने बताउनु भयो । नगरसभाको अर्काे बैठक बैशाख ११ गते बस्नेगरी स्थगित भएको छ ।
