फिक्कल: प्रविधिमा फड्को मारेको इलामको सूर्योदय नगरपालिकाले कर्मचारीलाई थप प्रविधिमैत्री बनाउन आर्टीफिसियल इन्टेलीजेन्स (ए.आई.) तालिम संचालन गरेको छ । नगरका सबै कामको पेपर लेस गरी अनलाईन सिस्टममा काम थालेको नगरले कर्मचारीलाई थप प्रविधिमैत्री बनाई नागरीकको काम छिटोछरितो तरीकाले गर्नका लागि कर्मचारीलाई २० घण्टे एआई तालिम संचालन गरेको हो ।
नगरले जिल्लामै पहिलो पटक काठ्माण्डौंको रोवटिक एसोसिएसन नेपालको प्राविधिक सहयोगमा तालिम संचालन गरेको सूर्योदयका नगर प्रमुख रण बहादुर राईले जानकारी दिनु भयो । एआई इन्जिनियरको सहयोगमा पहिलो चरणको तालिम संचालन गरेको नगरले कर्मचारीलाई पाइथनमा कोडिङ गरी एआई टुल्समा डाटा हेरफेर गर्ने सम्मको प्रशिक्षण दिइएको नगर प्रमुख राईले जानकारी दिनु भयो । नगर प्रमुख राईले भन्नु भयो ‘यसबाट स्थानीय सरकारले दिने सेवामा पारदर्शिता, छिटो–छरितो बनाउन फाइदा हुनेछ ।’
नगरपालिकाले कुनै पनि कामलाई सरल तरीकाले र नबुझेका कानून देखि निर्यणलाई सहज बनाउन सबै कानूनलाई व्यवस्थित गर्न समेत यस्को प्रयोग गर्न सकिने जनाएको छ ।
सूर्योदयले यस अघि नै सबै कार्यालय, बिद्यालयमा सीसी क्यामेर, डिजिटल हाजिरी जडान गरीसकेको छ । नगरले यातायतका साधनमा जिपिएस जडान गरेको छ । जसले सवारीको दुरुपयोग हुनबाट जोगाउदै आएको छ । नगरपालिकाले स्थानीय तहको दोस्रो निर्वाचन पछि कार्यपालिका बैडकको डिजिटल डिस्प्लेमा प्रत्यक्ष प्रसारण गर्दै आएको छ । साथै नगरका सार्वजनिक महत्वका बिभिन्न कार्यक्रम समेत प्रत्यक्ष प्रसारण गर्दै आएको नगरका सूचना प्रविधि अधिकृत उज्वल सुवेदीले जानकारी दिनु भयो ।
