फिक्क्ल: सूर्योदय नगरपालिकाको पर्यटकीय क्षेत्र कन्याममा होटल तथा रेष्टुरेन्ट संचालन गरिरहेका स्थानीय युवाले कन्याममा पर्यटकीय क्षेत्र सरसफाई गरेका छन् ।
कन्याममा पर्यटकीय क्षेत्र सरसफाई समितिले पर्यटकीय क्षेत्रमा “स्वस्छता हाम्रो पहिचान, सफाईमा मेरो योगदान“ भन्ने नाराका साथ स्वतस्फुर्त रूपमा सरसफाई गरेको हो । मंगलबार छैटौं हप्ताको सरसफाई सम्पन्न गरेको छ ।
कन्याममा ट्रली व्यवसाय गरिरहेका व्यवसायी ,घोडचढी ब्यवसायी, नगर प्रहरी , पर्यटकीय स्थलमा शुल्क ठेक्का लिने ब्यवसायीको सहयोगमा सरसफाई गरेका हुँन । एक सय बढी युवाहरूले गत माघ महिनाको दोस्रो मंगलबारबाट शुरू भएको सरसफाई कार्यक्रम हरेक मंगलबार हुने गरेको छ ।
सूर्योदय नगरपालिकाको पर्यटकीय स्थल कन्याम चिया बगान बिचमा रहेका पसल तथा आगन्तुकबाट हुने फोहोर सडक छेउछाउ र चिया बगान भित्र समेत फालीने गरीएको छ । उक्त फोहोरलाई शुन्यमा झार्ने अभियानमा सरसफाई गरिएको अभियानमा सहभागी जीवन प्रधानले जानकारी दिनु भयो ।
कन्यामको पर्यटनको मेरूदण्ड कन्याम चिया बगान रहेको र आफ्नै घरपरिवारका सदस्य साथै छरछिमेक समेतले काम गर्ने स्थानमा शिसा प्लास्टिकका बोतल चाउचाउ बिस्कुटका खोल आदिले सुन्दर चिया बगान कुरूप हुँदै गएकाले सरसफाईको अभियान थालेको जानकारी होटल ग्रिन कार्पेटका संचालक यज्ञराज गिरी दिनु भयो ।
इलामको कन्याममा बर्सेनि हजारौं पर्यटकले भ्रमण गर्ने गरेका छन । यस बर्षको चियाको पत्ता पलाउने सिजन पनि चैतबाट शुरू हुने र नयाँ बर्ष मनाउन समेत स्वदेशी र बिदेशी पर्यटक आउने भए पछि स्थानीय जागरुप भएर कन्याम सरसफाई गरेका हुँन । पर्यटककोलागि चियाबारी घुम्न घोडचढी गर्न जातीय सांस्कृतिक पोशाकमा फोटो खिच्न इलामको कोशेली किन्न , स्र्का वाल्क गर्न , जीपलाइन खेल्ने र प्याराग्लाईडिङ गर्ने सुबिधा हाल कन्याममा उपलब्ध छ ।
